Японияда 2011 йилдаги ҳалокатли зилзила ва уни ортидан келган цунами оқибатида бедарак йўқолган 6 ёшли Нацусе Яманенинг жасад қолдиқлари ортидан 14 йил ўтиб топилди ва оиласига топширилди. Бу ҳақда The Straits Times хабар берди.
Маълумотларга кўра, полиция Мияги префектурасининг Минами-Санрику шаҳрида 2025 йил 16-октябрь куни Нацусенинг суяк қолдиқларини унинг ота-онасига расман топширган.
Қизчанинг онаси Чиюми Ямане суяклар солинган идишни бағрига босиб, кўз ёши билан “Уйга қайтганинг учун раҳмат, қизим”, деган. Бу сўзлар йиллар давомида интизорлик билан қизини кутган оиланинг оғриқли, аммо енгил нафас олиш лаҳзаси бўлди.
Нацусе фожиали зилзила вақтида бувиси билан уйда бўлган. Тўсатдан келган тўфон уларни сув оқимига тортиб кетган. Мўъжиза билан бувиси омон қолган бўлса-да, қизалоқдан хабар бўлмаган. Бир неча ой давомида оиласи уни излаган, ҳатто тирик қолган бўлиши мумкин деган умидни йўқотмаган. Аммо ярим йилдан кейин улар қизининг ҳаётда эмаслигини тан олишга мажбур бўлган.
Шундан сўнг, ҳар йили июнь ойида — Нацусенинг туғилган кунида — оиласи унинг севимли қаймоқли тортларидан тайёрлаб, хотирасини ёд этган.
2023 йил февраль ойида Минами-Санрикудан тахминан 100 километр узоқликдаги Ивате префектураси қирғоғида бир киши соҳилни тозалаш пайтида жаг суяги парчасини топган. Кейинчалик митохондриал ДНК таҳлили орқали бу суяклар айнан Нацусега тегишли экани аниқланган.
“Биз учун бу фақатгина суяк эмас — бу оиламиздаги йўқолган парчанинг қайта топилиши. Вақт гўё яна ҳаракатлана бошлагандек туюлди”, деган қизчанинг онаси Чиюми Ямане.
Нацусенинг тарихини эшитган японияликлар бу воқеани сабр ва умиднинг тимсоли сифатида қабул қилмоқда. 14 йиллик интизорликдан сўнг қизчанинг охирги манзили оила бағрида топилгани кўпчиликни қаттиқ ҳиссиётга солди.
“Zamin”ни Telegram'да ўқинг!
