Париж прокуратураси маълумотига кўра, Лувр музейида содир этилган йирик ўғирлик Францияга 88 миллион евро зарар етказган.
Бу ҳақда Париж прокурори Лор Бекко BFMTV телеканали орқали маълум қилди.
— Лувр директори етказилган зарарни 88 миллион еврога баҳолаган. Бу улкан миқдор, аммо тарихий зарар билан таққослаб бўлмайди, — деди у.
Франция Маданият вазирлиги эса Financial Times нашрига берган изоҳида, ўғирланган заргарлик буюмлари суғурталанмаганини таъкидлади. Сабаби, Лувр музейида суғурта сиёсати одатда қўлланилмайди — чунки Леонардо да Винчининг “Мона Лиза” ёки “Буюк Танис сфенкси” каби асарларнинг ҳақиқий қийматини аниқ баҳолашнинг иложи йўқ. Вазирлик вакилининг сўзларига кўра, давлат бундай ҳолларда ўзини суғурталовчи сифатида кўради, агар экспонатлар белгилаб қўйилган хавфсиз шароитда сақланса.
Маданият вазири Рашида Дати якшанба куни музейдаги талончилик ҳақида расман маълум қилди. Маълум бўлишича, Наполеон III даврига тегишли саккизта қимматбаҳо буюм — диадема, жиға ва маржонлар ўғирланган.
Тергов маълумотларига кўра, ўғрилар музей жиҳозларини етказиб берувчи билан олдиндан келишган бўлиши мумкин. Улар жиноят содир этгандан сўнг скутер ва велосипедда жойни тарк этгани айтилмоқда.
“Zamin”ни Telegram'да ўқинг!
