Қирғизистон пойтахти Бишкекда, Украина элчихонаси ва Қирғизистон президентининг янги қароргоҳи — “Интимақ Ордо” оралиғига забардаст LED-дисплей қад ростлади. Бу ҳолат Россия президенти Владимир Путиннинг шаҳарга ташрифи ва Коллектив Хавфсизлик Шартномаси Ташкилоти (КХШТ) саммити олдидан содир бўлди. Журналист Григорий Пирликнинг сўзларига кўра, бир неча қаватли уй баландлигидаги бу иншоот Украина элчихонаси ҳудудидаги миллий байроқни қароргоҳ томонидан кўринишдан яширади.
ФСО талаби ёки тасодиф?
Қирғизистон президенти матбуот хизмати экраннинг расмий мақсадини “давлат видео контентларини кўрсатиш ва протокол тадбирларига визуал ҳамроҳлик қилиш” деб тушунтирди. Бироқ, бир қатор ОАВ буни тўғридан-тўғри Путиннинг ташрифи билан боғлади. Қирғизистондаги Украина элчиси маслаҳатчиси Денис Автономов қисқача: “Боғлиқлик шубҳасиз мавжуд”, дея изоҳ берди. Сиёсий шарҳчи Турат Акимов буни Россия ФСО (Президентни қўриқлаш хизмати) фаолиятига боғлаб, махсус хизмат ходимлари Украина элчихонаси ҳудудидан Путин учун хавф пайдо бўлиши эҳтимолини ҳисобга олган бўлиши мумкинлигини тахмин қилди.
Путиннинг янги таҳдидлари ва сулҳ режаси
Путин “Интимақ Ордо”да ўтган КХШТ саммити якунлари бўйича матбуот анжуманида нутқ сўзлади. Россия етакчиси декабрь ойи бошида АҚШ делегацияси Москвага Доналд Трампнинг сулҳ режасини муҳокама этиш учун келишини тасдиқлади. У Москва АҚШ маъқуллаган урушни тўхтатиш режасини келгуси келишувлар асоси сифатида қабул қилишга тайёрлигини айтди. Шу билан бирга, Путин таҳдидли оҳангда билдирди: Россия Украина шарқида ўзи талаб қилаётган ҳудудлар берилмагунча ҳарбий ҳаракатларни давом эттиради ва агар Украина қўшинлари чиқиб кетмаса, бунга “қуролли йўл билан эришишга” ваъда берди.
Киевнинг қатъий раддияси
Украина президенти девони раҳбари Андрей Ермак 27 ноябрь куни The Atlantic нашрига берган интервюсида Киев ҳудудлардан воз кечиш масаласини муҳокама қилмаслигини маълум қилди. У Конституция бунга йўл қўймаслигини таъкидлаб, Володимир Зеленский президент бўлиб турган экан, оккупация қилинган ҳудудларни тан олишга “ҳеч ким умид қилиши керак эмас”лигини айтди. Ермакнинг сўзларига кўра, ҳозир Украина гаплаша оладиган ягона нарса — уруш қилаётган томонлар назоратидаги ҳудудларни ажратиб турадиган чегара чизиғини муҳокама қилишга тайёрлигидир.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
