Осакада 20 ёшли йигит уч ўсмирга ҳужум қилди

Японияда 20 ёшли йигит уч нафар ўсмирга пичоқ билан тан жароҳати етказди. Жабрланувчилардан бири олинган оғир жароҳатлар оқибатида ҳалок бўлган.

Бу ҳақда маҳаллий полицияга таяниб Kyodo News хабар берди.

Маълумотларга кўра, ҳодиса Осака шаҳри марказида жойлашган машҳур сайёҳлик ҳудуди — Дотонбори туманида содир бўлган. Ҳужум қилган шахс ва жабрланувчи ўсмирлар ўзаро таниш бўлиб чиққан.

Дастлаб улар ўртасида оғзаки тортишув келиб чиққан, кейин эса жанжал қўл жангига айланиб кетган. Шу жараёнда гумонланувчи пичоқ ишлатиб, уч нафар ўсмирга жароҳат етказган.

Оқибатда барча жабрланувчилар шифохонага етказилган, бироқ улардан бирининг ҳаётини сақлаб қолишнинг иложи бўлмаган.

Нашр қайд этишича, воқеадан сўнг қочиб кетган тахминан 20 ёшлар атрофидаги шахс Nara Prefectural Police томонидан қўлга олинган.

Айни пайтда мазкур ҳолат юзасидан тергов ҳаракатлари давом эттирилмоқда.

Charos Zarqarayeva

«ZAMIN.UZ» муҳаррири