ДНК тести ортидан автомобил сотувчиси шаҳзодага айланди

Бельгиялик автомобил сотувчиси Клеман Ванденкеркове 26 ёшида ҳаётини бутунлай ўзгартирган янгиликка эга бўлди. ДНК таҳлили натижасида унинг Бельгия қироли Филиппнинг укаси, шаҳзода Лораннинг ўғли экани расман тасдиқланди.

Клеман 2000 йил август ойида бельгиялик хонанда Венди Ван Вантен, асли исми Ирис Ванденкеркове, оиласида дунёга келган. Унинг онаси 1990-йилларда шаҳзода Лоран билан муносабатда бўлган. Бироқ у Лораннинг кимлигини ўғлига Клеман 16 ёшга тўлгунига қадар айтмаган.

Кейинчалик Ванденкеркове Лоран билан боғланиб, оталик масаласига ойдинлик киритишни истаган. Шаҳзода ДНК текширувидан ўтишга розилик билдирган. Таҳлил натижалари эса Лоран Клеманнинг биологик отаси эканини тасдиқлаган.

Тахминан олти ой аввал ота ва ўғил муносабатларини расмийлаштириш учун шаҳар ҳокимлигида камтарона маросим ўтказган. Шундан сўнг Лоран Бельгия фуқаролик реестрида Клеманнинг отаси эканини расман қайд эттирган.

Энди у қироллик оиласининг бир қисми

Оталикнинг расмий тан олиниши Клеманга Лораннинг шахсий мол-мулки бўйича унинг уч нафар ярим туғишган фарзанди билан тенг мерос ҳуқуқини беради. Булар — 20 ёшли малика Луиза ҳамда Лораннинг рафиқаси малика Клэрдан туғилган 19 ёшли эгизаклар шаҳзода Николас ва шаҳзода Аймерик.

Бироқ Клеман қиролликдан махсус нафақа олмайди ва расмий қироллик вазифаларини бажармайди. Шунингдек, унинг Бельгия тахтига даъво қилиш ҳуқуқи ҳам йўқ.

У отасининг оилавий фамилияси — Сакс-Кобургни қабул қилиши мумкин. Аммо Клеман онасининг фамилияси бўлган Ванденкерковени сақлаб қолиш ниятида.

«Мен Ванденкеркове фамилияси билан фахрланаман. Агар ундан воз кечсам, бу онамнинг мен учун қилган барча ишларига хиёнат бўлади», — деган у фламанд тилидаги Het Nieuwsblad нашрига.

Ҳақиқатни 16 ёшида билган

Ванденкеркове ўзининг қироллик оиласига мансублигини биринчи марта ўтган йил сентябрь ойида Бельгиянинг VTM телеканалида намойиш этилган ҳужжатли фильмда гапириб берган.

Унинг сўзларига кўра, онаси Лоран унинг ҳақиқий отаси эканини айтган. Кейинчалик Клеман бу масалани муҳокама қилиш учун шаҳзода билан учрашган.

Ота ва ўғил ДНК таҳлилини биргаликда шифохонада топширган. Клеманнинг айтишича, Лоран уни хотиржам қилиш мақсадида текширувни биринчи бўлиб ўзи топширишни таклиф қилган.

Оталик тасдиқланганидан кейин улар ўртасида яқин муносабатлар шакллана бошлаган. Клеманнинг таъкидлашича, шундан сўнг у ва отаси ўртасида «очиқ ва самимий суҳбатлар» кўпайган.

Қизиғи, бу воқеа Бельгия қироллик оиласидаги яна бир узоқ давом этган оталик можаросини эслатади. Лораннинг отаси, собиқ қирол Альбер II ҳам бир неча йил давомида оталик даъвосини рад этган. Бироқ 2020 йилда у Дельфин Бёль исмли аёлнинг отаси эканини тан олган.

Бёль ҳам узоқ давом этган суд жараёнида ғалаба қозониб, малика унвонига эга бўлган. Ҳозир у Дельфин де Сакс-Кобург исмидан фойдаланади.