Путин советлар Конституциясини иттифоқ парчаланишида айблади

^{Фото: kremlin.ru}
РФ президенти Владимир Путин «Россия 1» телеканалига берган интервьюсида СССР Конституциясида «вақти-соати келиб портлайдиган мина» бўлгани ҳақида гапирди. Бу билан у республикалар иттифоқ таркибидан ажралиб чиқиш ҳуқуқига эга бўлганини назарда тутган.

«Совет иттифоқи ташкил топган вақтда 1922 йилги Конституцияда «иттифоқчи республика ягона давлат таркибидан ажралиб чиқиши ҳуқуқига эгалиги ҳақида Ленин тезиси» мустаҳкамланган», деган Путин. Унинг қайд этишича, Сталин бошқача фикрда бўлган, у миллий бирлашмалар РСФСР таркибига автоном ҳудуд сифатида кириши кераклиги ҳақида гапирган. Унга кўра, иттифоқдан чиқиш ҳуқуқи кўзда тутилмаганди.

Путин алалоқибат Сталиннинг эмас, Лениннинг ғояси амалга ошганини, лекин Конституцияда иттифоқ таркибидан чиқиш тартиби белгиланмаган бўлганини айтиб ўтган.

«Натижада республикалар СССР таркибидан чиқишда «ўзи олиб келган нарсаларни эмас», «рус халқидан совғалар»ни ўзи билан олиб кетган. Ахир буларнинг ҳеч бири ёзилмаганди», — дея қайд этган Путин.

Путин бундай хатолардан қочиш учун амалдаги Конституцияга тузатишлар киритиш зарур бўлган деб ҳисоблайди ва замонавий Россия бунга йўл қўймаслиги кераклигини таъкидлайди. «Бу тузатишлар бизнинг давлатчилигимизни мустаҳкамлайди ва мамлакатимиз кейинги ўн йилликларда жадал ривожланиши учун шароит яратади», — дея маълум қилган РФ президенти.

Россия президентидан «Москва. Кремль. Путин» дастури учун олинган интервьюдан парча «Вести.ру» сайтида эълон қилинди. Дастур 5 июль куни Москва вақти билан соат 22:00да эфирга узатилди.

Путин аввалроқ ҳам собиқ иттифоқ республикалари мустақил бўлаётганда, тарихан Россия ҳудуди бўлган ерларни олиб иттифоқ таркибидан чиқиб кетишганидан норозилигини билдиргани хабар қилинганди.
Шунингдек, у Иккинчи жаҳон уруши ҳақидаги мақоласида Болтиқбўйи давлатларининг СССРга қўшилиши қонуний бўлгани ҳақида ёзганди.

Эслатиб ўтамиз, Россия Конституциясига тузатишлар киритиш бўйича таклиф 2020 йил бошида Путиннинг ўзи томонидан берилганди. Тузатишлар рўйхатида Путиннинг президентлик муддатларини ноллаштириб, унга 2024 ва 2030 йилги сайловларда ҳам номзодини қўйишга имкон берувчи банд ҳам қўшилган.

Асосий қомусга ўзгартиришлар киритиш бўйича умумхалқ референдуми 25 июндан 1 июлгача бўлган муддатда ўтказилди. МСК эълон қилган маълумотларга кўра, сайловда иштирок этганларнинг 77,92 фоизи тузатишларга розилик билдирган, 21,27 фоизи қарши бўлган. Овоз беришда давомат 67,97 фоизни ташкил қилган. 3 июль куни Путин Конституцияга тузатишлар киритиш тўғрисидаги фармонини имзолади.

Манба: Kun.uz «Замин»ни Telegram’да ўқинг!