Афғонистоннинг Хитойдаги элчиси олти ойдан буён маошсиз ишлаётгани туфайли ишдан бўшади

^{Фото: Reuters}
Афғонистоннинг Хитойдаги элчиси Жовид Аҳмад Қаюм Кобулдаги ҳукумат томонидан олти ой давомида маоши тўлаб берилмагани туфайли ўз лавозимини тарк этди. Бу ҳақда Reuters хабар берган.

Элчи ўзининг ёзма ҳисоботида Афғонистоннинг Пекиндаги элчихонасида ишлаган кўплаб дипломатлар Хитойни тарк этгани, сабаби Кобулдаги ҳукумат августдан, яъни «Толибон» мамлакатда ҳокимиятни қўлга олганидан буён ўз маошларини олмай ишлаганлигини қайд этган.

«Шарафли масъулият якунига етди: мен элчи лавозимидан бўшадим. Мен учун Афғонистон ва ўз халқим учун ишлаш ғурур бағишлади. Элчиликдан кетишимнинг бир нечта сабаби бор, шахсий, профессионал, бироқ бу ерда уларни ёзиб ўтмоқчи эмасман», – дея қайд этган Жовид Аҳмад Қаюм.

Қаюмнинг сўзларига кўра, элчихонага хизмат кўрсатган ходимларга 2022 йил 20 январда улар қилган меҳнат учун тўловлар қилинган ва энди уларнинг фаолияти ҳам тугаган. Мазкур ишчиларнинг меҳнатига ҳақ тўлаш элчихонанинг 100 минг доллар маблағи қолган ҳисоб рақамларидан биридан амалга оширилган.

Элчининг хабар қилишича, у элчихона автомобиллари калитларини ўз хонасида қолдирган, шунингдек, у иккита автомобилни аллақачон металлоломга топшириш кераклигини билдирган. Афғонистон ҳукумати мамлакатнинг Пекиндаги янги элчиси ким бўлиши ҳақида расмий маълумот бермаган, бироқ Қаюм ўз хатида элчихонага янги одам тайинланиши ва унинг «жаноб Садаат» эканлигини ёзган.

Хитой Ташқи ишлар вазирлигининг расмий вакили Ван Венбин ҳар куни ўтказиладиган брифингда Қаюмнинг Хитойни тарк этгани ва унинг қаерга ва нима учун кетаётганини билмаслигини айтган. “Замин” янгиликларини “Инстаграм”да кузатиб боринг