Шифокорлар ҳар куни 1–2 стакан қатиқ ичишни тавсия этмоқда. Россиялик гастроэнтеролог Евгений Белоусовнинг таъкидлашича, қатиқ инсон организми учун нафақат мазали ичимлик, балки соғлом ичак микрофлорасини сақлаб туришда муҳим манба ҳисобланади.
Мутахассиснинг айтишича, қатиқнинг энг катта аҳамияти унинг таркибидаги пробиотик бактериялар билан боғлиқ. Улар ичакдаги фойдали микрофлорaни мувозанатда ушлаб, ҳазм жараёнини енгиллаштиради, организмнинг озуқа моддаларини яхши ўзлаштиришига ва иммунитетни кучайтиришга ёрдам беради.
Шунингдек, қатиқ ирритабий ичак синдроми, ич қотиши ёки диарея каби муаммоларга дуч келувчи инсонлар учун ҳам фойдали. Лактозани ҳазм қилишда қийналадиганлар учун эса у енгил вариант бўлиб, сутга нисбатан анча яхши сингади.
“Қатиқ таркибида кальций, магний, фосфор, В гуруҳи витаминлари — айниқса В12 ва рибофлавин, ҳамда К2 витамини бор. Уларнинг барчаси асаб тизими фаолияти, суяк мустаҳкамлиги ва терининг ҳолати учун жуда муҳим”, — деди Белоусов.
Шифокорнинг сўзларига кўра, қатиқ антиоксидант хусусиятга ҳам эга бўлиб, суякларни мустаҳкамлайди, остеопорознинг олдини олади ва вазнни назорат остида ушлашга ёрдам беради.
Бироқ айрим инсонлар учун қатиқ эҳтиёткорлик билан истеъмол қилиниши лозим. Масалан:
– лактоза интолеранси ёки сут маҳсулотларига аллергияси борлар учун у нохуш таъсир кўрсатиши мумкин;
– кекса ёшдагилар ёки иммунитети заиф кишилар уни мунтазам ичишдан олдин шифокор билан маслаҳатлашиши керак.
Белоусов кунига 1–2 стакан қатиқ ичишни тавсия этади. Ундан максимал фойда олиш учун қатиқни ҳафта давомида бир неча марта рационга қўшиш ва мувозанатли таомланиш билан бирга қўллаш керак.
Шундай қилиб, қатиқ — бу оддий сут маҳсулоти эмас, балки соғлом ҳаёт тарзи учун табиий ёрдамчи. Аммо ҳар бир нарсада бўлганидек, миқдор ва мосликни унутмаслик зарур.
“Zamin”ни Telegram'да ўқинг!
