Хайр 2018 йил, салом Янги йил! (фото)

Мана, мезбон йилни кузатиб, меҳмон йилни қарши олиш вақти келди. Яхши-ёмон кунлар, турли синовлару мукофотлар билан ҳар биримизни “сийлаган” ит йили ўз ўрнини навбатдаги мучалга бўшатиб бермоқда. 12 йил ўтиб, яна юз кўришаётганимиз тилларанг тўнғиз 2019 йилга тўғри келди. Келинг, уни муносиб қарши олайлик. Токи бутун йил биз ва оиламиз учун омадли ва баракали ўтсин.

Қандай кутиб оламиз?
Мучал соҳибидан келиб чиққан ҳолда арча безатишда сариқ, яшил, жигар ва тилларангли безагу ўйинчоқлардан кўпроқ фойдаланган маъқул. Эгнингиздаги либосда ҳам шу ранглар оз бўлса-да, акс этса, янада яхши.

Байрам дастурхони чиройли бўлишига ҳаракат қилинг. Чунки «тўнғиз» тўкин-сончинлик, бойликни хуш кўради. Айниқса, товуқ гўштидан тайёрланган таомлар дастурхонингиз кўркига айланиши мумкин.

Ва энг муҳими, бу — ушбу жониворга хос бўлган қувноқлик ва хушчақчақликни қўлдан бой бермасликдир. Байрам дастурхони атрофида ҳукм сурадиган самимийлик, шодлик ва чинакам меҳр-муҳаббат бутун йил мобайнида оила аъзоларингизни тарк этмайди.

Тўнғиз йили кириб келишидан аввал барча чети учган, дарз кетган идиш-товоқлардан қутулинг. Негаки улар ортиқча харажат, молиявий муаммоларга сабаб бўлади дейишади.

Урфдаги услуб
Дизайнерлар фикрича, 2019 йилда кенг бичимли либослар, йирик фонар-енглар, фатиндан тикилган шиширилган юбкалар урфда бўлади.

Стилистлар эса сизни янада ёрқин бўлишга ва янгича образларни ўзингизда синаб кўришдан чўчимасликка чорламоқда.

Макияж борасида янаги йилда кўзларга кўпроқ урғу берилиши тахмин қилинмоқда. Тасаввур қилиб кўринг-а, тилларанг суюқ қаламдан тортиб пушти, сариқ тенлар “бюти-тренд” га чиқади.

Кимга қандай совға оламиз?
Совғасевар болажонлар қорбободан ажойиб туҳфа кутаётганлари аниқ. Уларнинг истакларини амалга ошириш сизнинг зиммангизда. Умуман олиб қараганда, ширинтойларимизга харид қилишимиз мумкин бўлган совғалар хилма-хил. Ширинликлардан тортиб ўйинчоқларгача, фарзандингизнинг махсус буюртмаларидан тортиб мультқаҳрамон либосигача. Шу боис ҳам улар ичидан бирини танлаш ниҳоятда мушкул.

Танловда адашиб қолишни истамасангиз, синовдан ўтган брендлар, яъники, ишлаб чиқарувчиларнинг янгича фантазияларига таянинг.

Айни кунларда савдо дўконларида болалар учун байрамона тўпламларнинг турли-туманлари сотувга қўйилган. Ракета ва автобус шаклидаги тўпламлар, мевали ва қандли арчалар улар орасида ажралиб туради.

“Ўзим боплайман!”
Шунингдек, сиз байрамона қутининг ўзини харид қилган ҳолда уни фарзандингиз яхши кўрадиган ва у учун фойдали, деб ҳисоблайдиган маҳсулотлар билан тўлдиришингиз мумкин. Агар сиз фаолият кўрсатаётган ташкилотдан болалар учун байрам совғаларини тақдим қилишса, нур устига нур.

Бошқаларга-чи?
Оилангизнинг бошқа аъзоларига, хусусан, турмуш ўртоғингиз, қайнота-қайнонангиз, овсин ва келинларга қандай ҳадя олиш ўзингизга ва жамғармангизга боғлиқ. Биз бу борада ёдда қолувчи сувенирлар, шоколадли тўпламлар, атир ва упа-эликларни тавсия қилишимиз мумкин.

Агар совға эгаси кўпдан буён орзу қилиб келаётган ёки эҳтиёж сезаётган нарса-буюмни харид қилсангиз, бундан яхшиси бўлмайди. Бунинг учун ҳозирданоқ уларнинг истакларига қулоқ тутишга ҳаракат қилинг.

Дарвоқе, совға улашишнинг имкони бўлмаган узоқдаги қадрдонларни ҳеч бўлмаса, самимий тилаклар билан қутлаб қўйишни унутманг.

Шу ўринда кўпга аён ҳақиқатни яна бир карра эслатиб ўтмоқчимиз. Совғанинг катта-кичиклиги эмас, чин кўнгилдан тортиқ қилингани энг афзалидир. Биз барчага ана шундай самимийликни ва бахтли, шодон онларга бой янги йилни тилаб қоламиз.

Манба: Darakchi.uz “Замин” янгиликларини “Youtube”да кузатиб боринг