Жаҳонда бойлиги миллиард доллардан юқори бўлган шахслар сони сўнгги йилларда тез суръатлар билан ортиб бормоқда. Forbes нашрининг 40 юбилей рейтингига кўра, бу тенденция янада яққол намоён бўлмоқда.
Ҳозирги кунда дунё бўйича миллиардерлар сони 3 428 нафарга етган бўлиб, бу кўрсаткич 2025 йилга нисбатан тахминан 400 нафарга кўпдир. Ҳисоб-китобларга кўра, ҳар куни дунёнинг турли нуқталарида камида битта янги миллиардер пайдо бўлмоқда.
Уларнинг умумий бойлиги эса 20,1 триллион доллар атрофида баҳоланмоқда. Таққослаш учун, АҚШнинг 2025 йилдаги ялпи ички маҳсулоти тахминан 30 триллион долларга тенг экани қайд этилган.
Forbes рўйхатида энг юқори ўринни Илон Маск эгаллаган бўлиб, унинг бойлиги Tesla ва SpaceX компаниялари ҳисобига шаклланган. Кейинги ўринларда Google асосчилари Ларри Пейж ва Сергей Брин, Amazon асосчиси Жефф Безос ҳамда Meta раҳбари Марк Цукерберг каби йирик тадбиркорлар жой олган.
Шунингдек, Nvidia раҳбари Женсен Хуанг сунъий интеллект соҳасидаги ўсиш туфайли илк бор топ-10 таликка киргани қайд этилган. Алишер Усмонов эса Россия миллиардерлари рейтингида 10-ўринда туради.
“Zamin”ни Telegram'да ўқинг!
