Bitcoin қазиб олиш бўйича дунёдаги энг йирик платформалардан бири — Ф2Поол асосчиси Чун Ванг SpaceX компаниясининг Марсга йўналтирилган илк сайёралараро миссиясига қўшилди. Хитойда туғилган ва Мальта фуқаролигини олган тадбиркор ушбу парвозни тўлиқлигича молиялаштирган. SpaceX маълумотларига кўра, икки йил давом этадиган ушбу миссия доирасида кема Ой орбитасидан ўтиб, Марс атрофида айланиб чиқади ва Ерга қайтиб келади. Бу ҳақда Cointelegraph.com хабар беради.
Чун Ванг Марс миссиясидан аввал Ой атрофида бир ҳафталик тижорий парвозда ҳам иштирок этишни режалаштирган. Тадбиркорнинг сўзларига кўра, АҚШ ва Хитой ўртасидаги рақобат туфайли Ойда базалар қурилиши тез орада ҳақиқатга айланади. Бироқ, у Марсга парвозлар бизнинг авлодимиз даврида амалга ошишига шубҳа билан қарамоқда. Шу сабабли, у SpaceX компаниясини Марс лойиҳасини кечиктирмасликка ундаш мақсадида ушбу парвозни сотиб олганини таъкидлади.
Ҳозирда технология олами вакиллари, жумладан Jeff Bezos, Ричард Брансон ва Жаред Исаакман каби миллиардерлар коинот туризмини фаол қўллаб-қувватламоқда. SpaceX режасига кўра, Марсга тадқиқот ва юк ташиш миссиялари 2028-йилдан эрта бошланмайди. Компаниянинг якуний мақсади Марсда 1 миллиондан ортиқ аҳоли яшайдиган, ўзини-ўзи таъминлай оладиган шаҳар барпо этишдир.
Чун Ванг 2013-йилда Ф2Поол платформасига асос солган бўлиб, ҳозирда у Bitcoin қазиб олиш бозорининг 11,85 фоиздан ортиғини назорат қилади. Тадбиркор аввалроқ SpaceX билан биргаликда Ер қутблари узра парвоз қилган "Фрам2" миссиясига ҳам бошчилик қилган эди. Унинг фикрича, янги миссия Марс шунчаки осмондаги нуқта эмас, балки инсоният бориб, соғ-саломат қайтиб келиши мумкин бўлган реал манзил эканини исботлайди.
“Zamin”ни Telegram'да ўқинг!
