Электрон тўловлар соҳасида катта ўзгаришлар кутилмоқда: муҳим учрашув бўлиб ўтди

Стратегик ислоҳотлар агентлигида электрон тўловлар улушини кўпайтириш бўйича комплекс чора-тадбирларни тайёрлаш доирасида молиявий сектор вакиллари билан навбатдаги мулоқот бўлиб ўтди. Бу ҳақда агентлик матбуот хизмати хабар берди.

Ушбу учрашувда мамлакатдаги йирик тўлов ташкилотлари — Click асосчиси ва бош директори Улуғбек Рустамов, OSON юридик директори Дилшод Келдияров ва Paynet бош директори Анвар Исамуҳамедов қатнашди.

Музокара давомида электрон тўлов тизимларининг бошқа турдаги ҳисоб-китобларга нисбатан устунлигини таъминловчи омиллар, шунингдек, электрон тўловлар қабул қилиниши шарт бўлган соҳалар рўйхатини кенгайтириш муҳимлиги муҳокама қилинди.

Тўлов ташкилотлари раҳбарлари автотураргоҳлар ва бозорларда патент тўловларини йиғиш каби соҳаларда ҳали ҳам нақд пул устунлигини таъкидлади. Ушбу йўналишларни ҳам электрон тўловлар қабул қилинадиган мажбурий соҳалар рўйхатига қўшиш таклифи билдирилди.

Шунингдек, темирйўл чипталари, коммунал хизматлар учун тўловлар ва маркетплейс орқали харидларни тўлиқ нақдсиз тизимга ўтказиш масаласи кўтарилди.

Маълум қилинишича, Стратегик ислоҳотлар агентлиги томонидан электрон тўловлар сонини ошириш, қулай ва замонавий тўлов инфратузилмасини яратиш мақсадида президент қарори лойиҳаси тайёрланмоқда. Бу мақсадда агентлик бизнес, IT-мутахассислар ва экспертлар билан мунтазам равишда фикр алмашмоқда. «Замин»ни Telegram’да ўқинг!