Ироқда янги марказ ёнди: 77 киши нобуд бўлди

Ироқдаги Кут шаҳри яна бир фожеа билан дунёни титратди. Жорий ҳафта мамлакатнинг жанубий-шарқий қисмида жойлашган ва бор-йўғи беш кун аввал иш бошлаган савдо марказида кучли ёнғин келиб чиқди. Бу ҳақда маҳаллий ва халқаро ахборот агентликлари хабар тарқатди.

Маълумотларга кўра, ёнғин 16 июль куни кечқурун бошланган. Ироқ Ички ишлар вазирлиги ва фавқулодда ҳолатлар хизмати биринчи бўлиб ҳолатга муносабат билдирди. Бир неча қаватдан иборат савдо марказини қамраб олган олов натижасида камида 77 киши ҳалок бўлди. Бу маълумотни AFP агентлиги ҳам расман тасдиқлади.

Бироқ бу барчаси эмас. Расмий манбаларга кўра, ўнлаб инсонлар ҳалигача бедарак. Қидирув-қутқарув ишлари давом этмоқда. Баъзи жабрланувчиларнинг жасадлари таниб бўлмас ҳолда топилмоқда.

Маҳаллий INA телеканали томонидан тарқатилган видеокадрларда ёнғиннинг қанчалик кучли бўлганини кўриш мумкин. Кўзга яққол ташланган манзара – бино ичида қамалиб қолган одамлар, томга чиқиб ёрдам сўраётган фуқаролар ва янада ёмони – нафас олиш имконидан маҳрум бўлиб, ўлим билан юзма-юз қолган инсонлар.

Ижтимоий тармоқларда эълон қилинган тасвирлар фожианинг кўламини янада чуқурроқ очиб берди. Баъзи видеоларда балконда қолиб кетган ёки ёнғиндан қутулиш учун ойнадан сакраётган инсонларни кўриш мумкин. Улардан кўпчилиги оғир ҳолда шифохонага етказилган.

Кутлик шифокор Носир ал-Курашининг айтишича, у ва яқинлари ўша пайтда савдо марказида овқатланиш ниятида бўлишган. «Уйимизда ток йўқ эди. Биз шунчаки кечки таом еб олиш учун шу ерга келган эдик. Бир пайт кондиционер портлади, кейин бутун бино ёнди. Чиқиш имкони бўлмади», – дейди у ҳолатни эслаб.

Шунингдек, бошқа гувоҳлар ҳам марказда ёнғин сигнализацияси ишламаганини, эвакуация чиқишлари йўлга қўйилмаганини билдиришган. Бу эса ёнғин оқибатида қурбонлар сони ортишига сабаб бўлганини кўрсатади.

Бинонинг эгасига қарши расман жиноий иш қўзғатилган. Прокуратура ва ички ишлар идоралари томонидан тергов ишлари бошланган. Савдо марказининг қурилиши ва хавфсизлик талабларига қанчалик жавоб бергани бўйича ҳам алоҳида текширув ўтказилиши айтилмоқда.

Ҳозирги вақтда Кут шаҳрида юрак эзувчи сукунат ҳукм сурмоқда. Восит вилояти ҳукумати томонидан ҳалок бўлганлар хотирасига уч кунлик мотам эълон қилинди. Савдо маркази атрофида ўнлаб одамлар йиғлаб тургани ва ўзаро ўз яқинларини излаётгани юракни титратади.

Мутасаддиларнинг айтишича, фожиага ёқилғи билан таъминлашдаги носозлик, хавфсизлик техникасига риоя қилинмаслик ва шамол тезлиги таъсир қилган бўлиши мумкин. Аммо расмий хулоса ҳали тайёр эмас.

Фуқаролар ҳукуматдан жавоб талаб қилмоқда. Чунки бундай янги ва замонавий қилиб қурилган бинода қандай қилиб шундай йирик ёнғин рўй бергани ҳамон тушунарсизлигича қолмоқда. Саволлар кўп, жавоблар эса кам.

Ҳалок бўлганлар орасида болалар ва кексалар ҳам борлиги маълум қилинди. Бу эса фожеанинг оғирлигини янада оширди. Айрим оилаларда бир вақтнинг ўзида бир неча аъзо қурбон бўлган. Яъни, ота, она ва фарзанд бирга ҳалок бўлган ҳолатлар қайд этилган.

Тез ёрдам машиналари, шифокорлар ва қутқарувчилар 24 соат давомида тинимсиз ишлаган. Олов тўлиқ ўчирилгандан кейин ҳам бинодан ис гази тарқалиши кузатилган. Бундан келиб чиқиб, қутқарувчилар ҳозирча бинога киришни хавфли деб ҳисоблашмоқда.

Ироқда сўнгги йилларда савдо марказлари ва оммавий жойларда хавфсизлик масалалари кўп бор танқид остида қолган. Бу фожеа эса мазкур соҳадаги чора-тадбирлар қайта кўриб чиқилиши шартлигини очиқ кўрсатди. «Замин»ни Telegram’да ўқинг!