Сурхондарё вилоятида жамият эътиборини кескин тортган ҳолат қайд этилди. Болалар омбудсмани Сурайё Раҳмонованинг маълумот беришича, Денов туманида вояга етмаган қизга турмуш қурдириш билан боғлиқ ноқонуний ҳаракатлар юз берган ва бу бўйича жиноят иши қўзғатилган.
Маълумотларга кўра, 2025 йил 8 июль куни туманнинг 67 ёшли аёл фуқароси ўзининг 15 ёшли набирасини 28 ёшли йигитга никоҳлаб бериш маросимини ташкил этган. Қиз ҳали қонунчиликда белгиланган никоҳ ёшига етмагани сабабли, расмий қайд жараёнлари амалга оширилмаган. Бироқ моддий манфаат эвазига 75 ёшли эркак улар учун шаръий никоҳ маросимини ўтказган.
Шу ҳолат юзасидан тергов органлари зудлик билан ҳаракат бошлади. Никоҳ ўқиб берган шахсга нисбатан Ўзбекистон Республикаси Жиноят кодексининг никоҳ ёши ҳақидаги қонун талабларини бузиш ва никоҳ тартибини қонунга хилоф равишда амалга ошириш билан боғлиқ моддалари асосида жиноят иши очилди. Шунингдек, 28 ёшли куёвга нисбатан 16 ёшга тўлмаган шахс билан жинсий алоқа қилишни назарда тутувчи модда билан иш қўзғатилди.
Ҳозирда ушбу жиноят иши бўйича дастлабки тергов ҳаракатлари олиб борилмоқда. Масъул идоралар томонидан ҳолат ҳар томонлама ўрганилиб, қонун доирасида қатъий чоралар кўрилиши таъкидланмоқда.
Мазкур воқеа яна бир бор вояга етмаганлар ҳуқуқларини ҳимоя қилиш ва уларнинг эрта турмуш қуришига қарши қатъий курашиш зарурлигини кўрсатиб берди. Оммавий муҳокамалардан кўриниб турибдики, жамият бу каби ҳолатларга нисбатан муросасиз позицияни қўллаб-қувватламоқда.
«Замин»ни Telegram’да ўқинг!
