Андижон вилоятида тунги пайтда содир бўлган қонли ҳодиса жамоатчиликни ларзага солди. Марҳамат туманида 26 ёшли эркак икки нафар фуқарога пичоқ билан ҳужум қилди, натижада бир киши ҳаётдан кўз юмди.
Маълум қилинишича, воқеа 16 декабрь куни соат 01:30 атрофида “Қовунчи” маҳалласи ҳудудида юз берган. Спиртли ичимлик истеъмол қилган Х.Қ. исмли шахс ўзига нотаниш бўлган 30 ёшли С.М. ва Б.М. билан жанжаллашиб қолган.
Жанжал кескин тус олгач, гумонланувчи ўзининг Damas автомашинасида бўлган хўжалик пичоғи билан С.М.нинг кўкрак қисмига зарба берган. Оқибатда фуқаро олган оғир тан жароҳати сабаб вафот этган.
Шундан сўнг Х.Қ. иккинчи фуқаро — Б.М.га ҳам пичоқ билан ҳужум қилган. У қорин соҳасига икки марта зарба беришга улгурган, бироқ атрофдагиларнинг аралашуви туфайли жиноятни охирига етказа олмаган.
Ҳолат юзасидан гумонланувчига нисбатан қасддан одам ўлдириш ва қотилликка суиқасд моддалари билан жиноят иши қўзғатилиб, у қонун доирасида қўлга олинган. Тергов ҳаракатлари давом этмоқда.
Қисқаси, бир лаҳзалик жаҳл ва мастлик — бир инсон ҳаёти, бошқаси учун эса умрбод пушаймон.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
