Томошабинлар пайқаган машҳур фильмлардаги қўпол хатолар (фото)

Фильм суратга олиш узоқ ва меҳнат талаб қиладиган жараён. Сменанинг охирига келиб актёрлар ҳам, суратга олиш гуруҳи ҳам шунчалик чарчаганидан хатоларга йўл қўйишади. Кинода энг кенг тарқалган хатолар — кутилмаганда пайдо бўладиган ва йўқолган нарсалар, кийим қисмлари, шунингдек, кадрга тушиб қолган бегона нарсалардир.

Круассаннинг сирли ғойиб бўлиши

“Гўзал аёл” фильмида Вивиан ҳашаматли меҳмонхонадаги нонуштада круассан еган ҳолда “Ота-онанг сен билан жуда фахрланса керак?” деган саволидан кейин камера Ричард Гирга ўтади ва бир сонияда яна актрисага қайтади. Тўсатдан қаҳрамон қўлидаги круассан панкейкка алмашиб қолади. Гап шундаки, қиз круассанни еб қўйган ва панкейкка ўтган. Шунчаки, режиссёр саҳнани бир неча марта суратга олган ва актрисанинг қўлларига қарамаган.

Буни режиссёр Гарри Маршаллнинг ўзи ҳам тасдиқлаб, унга Жулия Робертснинг саҳнанинг иккинчи қисмидаги чиқиши кўпроқ ёққанини, шунинг учун круассан сирли тарзда панкейкка айланганини, кейин эса улар қайта суратга олишганда ейишни бошлаганини тушунтиради. Айнан шу саҳна фильмнинг якуний версиясига киритилган.

Ўз-ўзидан тўлиб қоладиган қошиқ

“Қулай хоним” комедиясида агент Грэйси Харт барда музқаймоқ еган саҳна бор. Шу вақтда бир ҳамкасби ва унинг ҳамроҳи саломлашиш учун унинг олдига келишади. Уларнинг суҳбати давомида бўш қошиқ тўсатдан музқаймоқ билан тўлиб қолганини кўриш мумкин.

Газ фонусларидаги электр лампочкалар

Баъзида фильмларда келажакдан келган нарсалар пайдо бўлади. “Шамолларда қолган ҳисларим” романининг фильмга мослашуви 12 йил — 1861 йилдан 1873 йилгача бўлган даврни ўз ичига олади. Атланта кўчаларида суратга олинган фильмнинг айрим саҳналарида газ фонусларидаги лампочкаларни кўриш мумкин, ҳолбуки электр лампалар 1879 йилга келибгина ихтиро қилинган.

Мўжизавий оёқ кийимлар

“Арвоҳ овчилари” фильмида қаҳрамонлардан бири қадимий сеҳрга дучор бўлади. Чўлда яна бир жодуланган қаҳрамонга дуч келганида аёлнинг ялангоёқ юргани яққол кўринади. Бироқ у қадимий иблиснинг ёнидаги ўрнини эгаллаш учун зинапояларга кўтарилаётганда, баланд пошнали туфлида пайдо бўлади. Кейинчалик жоду ўз кучини йўқотганда пойабзал яна йўқолиб қолади.

Китоб ерга тушмайди

“Мумиё”да Эвини биринчи марта кутубхонада учратамиз. Нарвонда турган қиз қўлида китоб ушлаб, яқин атрофдаги шкафнинг жавонига қўйишга ҳаракат қилади. Лекин китоб қўлидан тушиб кетса-да, ҳеч қандай овоз эшитилмайди, полда ҳам бирорта китоб кўринмайди — худди шу заҳотиёқ ер ютиб кетгандек.

Шарбат доғи рангини ўзгартиради

“Ноттинг Ҳилл” мелодрамасида бош қаҳрамоннинг кўйлагига апелсин шарбати тўкилади. Томошабинлар апелсин доғи шакли ва рангини ҳайратланарли частотада саҳнадан саҳнага ўзгартирганини пайқашади.

Маржон йўқолиб қолади

“Титаник” саҳналарининг бирида — кечки овқат пайтида Роуз ўзининг бахтсиз келажаги ҳақида жиддий ўйлаётган саҳнада унинг бўйнида олмосли маржон бўлади. Кейинги саҳнада эса у палубага югуриб чиққанида маржон қаергадир йўқолади, қизнинг сочлари ҳам тўзғиб кетган бўлади.

Гап шундаки, охирги таҳрирда фильмдан вақтинчалик саҳна олиб ташланган, у ерда Роуз биринчи бўлиб хонасига югуриб кириб, жаҳл билан маржонини бўйнидан юлиб олган ва сочларини ёйган. Шундан кейингина кема тумшуғига югуради. Аммо томошабинлар буни кўрмагани учун айнан шу кадр тушунарсиз бўлиб қолган.

Бир шахтада иккита лифт

Ўтган ёзнинг энг машҳур блокбастерида Барби Mattel раҳбарларидан қочиб, пастга лифтда тушади. Унинг ортидан қуваётганлар ҳам ўша кабинага киришади. Аммо улар пастга тушаётганда томошабинларга Барбининг 1-қаватда лифтдан тушаётгани кўрсатилади. Эҳтимол, Mattel корпорацияси жуда зўр ва юқори технологияли бўлиб, уларда бир шахтада бир вақтнинг ўзида 2 та лифт ишлар. “Замин” янгиликларини “Одноклассники”да кузатиб боринг