Лионель Месси ўзининг футболдаги кумирлари номини ошкор қилди

Аргентиналик афсонавий футболчи, «Олтин тўп»нинг 8 карра соҳиби Лионель Месси ўзининг футболда кимларга ҳавас қилганини маълум қилди. Унинг айтишича, у доимо Пабло Аймар ва Диего Марадонага ҳурмат билан қараган ва уларнинг ўйин услубидан илҳомланган.

«Пабло Аймарнинг ўйинлари менга жуда ёқарди. У "Ривер Плейт"да ўйнаганида ажойиб жамоага эга эди ва ажралиб турарди. Унинг майдондаги ҳаракатлари менга ҳавас бағишларди.

Диего Марадона мен учун алоҳида аҳамиятга эга футболчи – биз аргентиналиклар учун у биринчи рақамли футболчи ҳисобланади. Кейин эса Паблони айтган бўлардим. Унга футболчи сифатида ҳавас қилардим, жуда яхши кўрардим», – деди Месси.

Пабло Аймар Аргентина футболида ўз ўрнига эга бўлган юлдузлардан бири ҳисобланади. У «Ривер Плейт», «Валенсия» ва «Бенфика» каби клубларда ўйнаб, ўзининг техник маҳорати билан ажралиб турган. Диего Марадона эса нафақат Аргентина, балки жаҳон футболи тарихидаги энг буюк футболчилардан бири сифатида тан олинган.

Лионель Месси бугунги кунда аргентиналик ёш футболчилар учун ўзи кумир саналади. Унинг футболга бўлган меҳри ва майдондаги ҳаракатлари бутун дунёдаги мухлисларни ҳайратга солиб келмоқда.

Манба: GiveMeSport “Замин” янгиликларини “Telegram”да кузатиб боринг