Россиялик ММА жангчиси Умар Нурмагомедов 25 октябрь куни Абу-Дабида бўлиб ўтадиган “UFC 321” турнири олдидан мухлисларга мурожаат қилди.
Нурмагомедовнинг таъкидлашича, бу жанг ММА мухлислари учун ҳақиқий томоша бўлади. Унинг фикрича, икки тажрибали жангчи майдонда кимнинг техникаси ва иродаси кучлироқ эканини намоён этади.
“Бу тўқнашувни албатта кўриш керак. Икки юқори даражадаги жангчи кимнинг ҳақиқий кучга эгалигини исботлайди. Бу галги октагонда янги Умарни кўрасиз”, — деди россиялик спортчи.
Мутахассислар бу жангни UFC'нинг йилдаги энг кутилган баҳсларидан бири сифатида баҳоламоқда. Чунки ҳар икки жангчи ҳам ҳужумкор услуби ва юқори тезлиги билан танилган.
Маълумот учун, Умар Нурмагомедов профессионал ММА фаолияти давомида 19 та жанг ўтказган. У шуларнинг 18 тасида ғалаба қозонган, фақат бир марта мағлубият аламини татиган. Унинг рақиби — америкалик Марио Баутиста эса 18 та жангда 16 ғалаба ва 2 мағлубият қайд этган.
Жанг Абу-Дабида бўлиб ўтади ва турнир “UFC 321”нинг марказий воқеаларидан бири бўлиши кутилмоқда. Кўплаб мухлислар Нурмагомедовдан янада кучли ва тажрибали жангчи сифатида намоён бўлишини интиқлик билан кутмоқда.
Шу тариқа, Умар Нурмагомедов яна бир муҳим синов остонасида турибди — у нафақат ғалаба учун, балки UFC да ўз нуфузини янада мустаҳкамлаш учун майдонга чиқади.
“Zamin”ни Telegram'да ўқинг!
