Суперлиганинг 28-туридан ўрин олган учрашувда Қаршининг “Марказий” стадионида кутилмаган натижа қайд этилди — “Насаф” ўз уйида “Машъал”га 1:2 ҳисобида мағлуб бўлди. Бу ғалаба мириқиб курашган “газчилар” учун қимматли очколарни тақдим этди, “аждарлар” эса чемпионлик учун курашда жиддий йўқотишга учради.
Беллашув бошиданоқ жадал руҳда ўтди. Илк дақиқаларда “Насаф” ҳужумкор ўйин билан устунликка эга бўлди. 13-дақиқада жамоа сардори Шароф Муҳитдинов ҳисобни очиб, қаршиликларга умид бағишлади. Аммо бу қувонч узоққа чўзилмади — орадан икки дақиқа ўтиб, “Машъал” яримҳимоячиси Ислом Шарипов ўз жамоасига тенгликни тиклади.
Биринчи бўлим юқори суръатда ўтган бўлса-да, ҳар икки жамоа имкониятларидан унумли фойдаланолмади. Иккинчи таймда “Насаф” жамоаси ташаббусни қўлга олишга ҳаракат қилди, аммо меҳмонлар ҳимояда ишончли ҳаракат қилди ва тезкор қарши ҳужумлар билан хавф туғдирди.
Баҳснинг ҳал қилувчи лаҳзаси 82-дақиқада содир бўлди — Амину Умар “Машъал”ни олдинга олиб чиқди ва жамоасига ғалаба келтирган голни киритди. Бу зарба нафақат уч очко, балки жамоанинг Суперлигада қолиш учун бўлган имкониятини ҳам кучайтирди.
Учрашувдан кейин “Насаф”нинг очколари 58 тада қолиб кетди ва жамоа чемпионлик пойгасидаги асосий рақиби “Нефтчи”дан уч очко орқада бормоқда. Энди қаршиликларни 29-турда “Пахтакор” билан жуда муҳим беллашув кутмоқда.
“Машъал” эса бу ғалаба орқали очколарини 29 тага етказиб, 12-поғонага кўтарилди. Йигитлар бундай руҳда давом этса, чемпионат охирида ўз ўрнини мустаҳкамлай олади.
Суперлига. 28-тур натижаси
“Насаф” – “Машъал” 1:2
Голлар: Шароф Муҳитдинов (13’) — Ислом Шарипов (15’), Амину Умар (82’).
Насаф — 35. Абдувоҳид Неъматов, 5. Ғолиб Ғайбуллаев ( 9. Жавоҳир Сидиқов, 71), 8. Зафармурод Абдираҳматов, 14. Шароф Муҳитдинов, 18. Ҳусайн Норчаев (2. Алибек Давронов, 60), 19. Стефан Чолович (7. Аденис Шала,60), 22. Игорь Голбан, 24. Сардор Баҳромов (10. Драган Черан,60), 34. Шерзод Насруллаев, 77. Ойбек Бозоров.
Машъал — 35. Достон Тўхтабоев, 5. Самандар Очилов, 10. Ҳумоюн Муртозаев (99. Нодирхон Хабибуллаев,65) 13. Нуриддин Нуриддинов (57. Амину Умар, 46), 15. Муҳаммадали Алиқулов, 19. Ислом Шарипов ( 8. Сардор Абдураимов, 75), 22. Нуржаҳон Музаффаров, 24. Авазхон Маматхўжаев (27. Зафарбек Акрамов, 65), 28. Эргаш Исмоилов, 37. Шерзод Файзиев, 80. Дмитрий Яшин.
“Марказий” стадионда кечган бу баҳс — Суперлиганинг сўнгги турларидаги энг сенсацион натижалардан бири сифатида ёдда қолади. “Насаф” энди чемпионлик учун фақат ўз натижаларига эмас, рақиблар хато қилишига ҳам умид боғлайди.
“Zamin”ни Telegram'да ўқинг!
