"Нефтчи" футбол клуби расман маълум қилишича, тажрибали немис мутахассиси Ханс-Юрген Гёде жамоага ёрдамчи мураббий сифатида қўшилди. 1956 йилда Германиянинг Гельзенкирхен шаҳрида туғилган Гёде футбол оламида ўз номини кўп йиллар аввалоқ мустаҳкамлаб улгурган.
Унинг профессионал футболчилик фаолияти машҳур “Шалке-04” клубида бошланган. Кейинчалик “Преуссен” ва “Фортуна Дюссельдорф” жамоалари сафида ўйнаб, айниқса, “Фортуна”да бир қатор мавсумлар давомида етакчи футболчи ва жамоа сардори сифатида майдонга тушган. Гёде Германия футболида из қолдирган ижрочилардан бири — у 343 та учрашувда иштирок этиб, 48 та гол урган.
1991 йилдан бошланган мураббийлик фаолияти ҳам унинг тажрибаси нақадар бой эканини кўрсатади. Гёде дастлаб “Фортуна Дюссельдорф”да ишлаган, шундан кейин Эроннинг машҳур “Персеполис” клубини бошқарган, ёшлар термаларига раҳбарлик қилган ва Осиё ҳамда Европада қатор жамоаларда фаолият юритган.
Унинг халқаро тажрибаси жуда кенг: Эрон, Баҳрайн, Малайзия, Озарбайжон, Ливия, Мянма ва Германия клубларида меҳнат қилган. Ўзбекистон футбол ишқибозлари учун эса Гёденинг номи бегона эмас — у 2003–2004 йилларда миллий термамизда аввал ёрдамчи, кейин эса бош мураббий сифатида иш олиб борган.
Эндиликда тажрибали мутахассис “Нефтчи”да Ислом Исмоиловга яқиндан ёрдам беради. Клуб раҳбарияти ва мухлислар янги мураббийдан жамоа ўйинини янада такомиллаштириш, тартиб-интизом ва тактик кўрсаткичларни юқори босқичга олиб чиқишни кутмоқда.
"Нефтчи"нинг янги мураббийлик штаби билан қай даражада ўсиш кўрсатиши эса олдиндаги учрашувларда ўз тасдиғини топади.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
