11:43 / 01.05.2026

АПЛдаги "энг омадсиз" трансферлар рўйхати: Йоан Висса етакчи...

Англия Премьер-лигасининг 2025/26 йилги мавсуми якунланар экан, футбол жамоатчилиги нафақат энг яхши ўйинчилар, балки кутилган натижани бермаган трансферлар ҳақида ҳам фаол муҳокама қилмоқда. Британиянинг машҳур нашри Daily Mail ушбу мавсумдаги энг омадсиз трансферлар рейтингини эълон қилди.

Рўйхатнинг биринчи поғонасидан жой олган трансфер — Йоан Виссанинг «Брентфорд»дан «Нюкасл»га 55 миллион фунт эвазига кўчиши бўлди. Унга катта умидлар боғланганига қарамай, футболчи ўзини кутилган даражада намоён эта олмади ва натижада ушбу трансфер мавсумнинг энг муваффақиятсиз битими сифатида баҳоланди.

Иккинчи ўринни Жеймс Макэйти эгаллади. У «Манчестер Сити»дан «Ноттингҳэм Форест»га 30 миллион фунтга ўтган бўлса-да, жамоада барқарор ўйин кўрсата олмади. Учинчи ўринда эса «Ливерпул»дан «Астон Вилла»га сотиб олиш ҳуқуқи билан ижарага берилган Ҳарви Эллиотт қайд этилди.

Қизиғи шундаки, рўйхатда юқори баҳоланган ва катта маблағ сарфланган футболчилар ҳам бор. Масалан, Александер Исакнинг «Нюкасл»дан «Ливерпул»га 125 миллион фунтлик трансфери тўртинчи ўринни эгаллади. Бу каби катта сармоя ҳар доим ҳам кутилган самарани бермаслигини яна бир бор кўрсатди.

Бешинчи поғонада Алехандро Гарначо («Манчестер Юнайтед»дан «Челси»га, 40 млн фунт), олтинчи ўринда Жон Ариас («Флуминенсе»дан «Вулверҳэмптон»га, 15 млн фунт) жой олган. Шунингдек, Конор Галлаҳер («Атлетико»дан «Тоттенҳэм»га), Жейми Гиттенс («Боруссия Дортмунд»дан «Челси»га), Хави Симонс («Лейпциг»дан «Тоттенҳэм»га) ва Лиам Делап («Ипсвич»дан «Челси»га) каби футболчилар ҳам топ-10дан ўрин олди.

Рейтингда яна бир қатор қизиқ позициялар ҳам мавжуд. Хусусан, Ник Волтемаденинг 69 миллион фунтга «Нюкасл»га ўтиши 12-ўринга жойлашган бўлса, Флориан Виртцнинг «Ливерпул»га 116 миллион фунтлик трансфери 14-ўринни эгаллади. Шунингдек, Тижани Рейндерснинг «Манчестер Сити»га 46,5 миллион фунт эвазига кўчиши 18-поғонадан жой олди.

Ушбу рўйхат яна бир ҳақиқатни исботлади: катта маблағ ҳар доим ҳам муваффақият кафолати эмас. Футболда натижа — фақат нархга эмас, балки мослашув, тактика ва жамоавий уйғунликка ҳам боғлиқ.

Энди савол шундай: келаси трансфер ойнасида клублар хулоса чиқарадими ёки яна шундай қиммат, лекин самарасиз харидлар давом этадими? Вақт барчасини ўз ўрнига қўяди.