Чемпионлар лигаси доирасидаги Бавария ва PSJ ўртасидаги баҳс ҳакамларнинг баҳсли қарорлари туфайли катта шов-шувга сабаб бўлди. Учрашувнинг 23-дақиқасида бош ҳакам Жоао Пинҳеиро Гарри Кейннинг дарвозабон билан яккама-якка чиқиб кетишига йўл қўймай, ўйиндан ташқари ҳолатни нотўғри қайд этди. Ушбу вазиятда қанот ҳаками байроқчани кўтармаган бўлса-да, бош ҳакамнинг ҳуштаги ўйинни тўхтатиб қўйди. Бу ҳақда Goal.com хабар беради.
Эксперт Майкл Баллак ҳакамнинг бу қарорини кескин танқид қилиб, уни қўпол хато деб атади. Унинг фикрича, ҳакам вазиятни охиригача қўйиб бериши ва ВАР тизими аралашувига имкон қолдириши керак эди. Шунингдек, 29-дақиқада Нуно Мендес тўпни қўли билан тўхтатганига қарамай, ҳакам унга иккинчи сариқ карточкани кўрсатишдан бош тортди ва аксинча, Бавария футболчиси Конрад Лаймерга нисбатан нотўғри қарор чиқарди.
Учрашув давомида юзага келган бу нохолисликлар Бавария бош мураббийи Винсент Компанининг кескин эътирозларига сабаб бўлди. Сами Хедира ҳам ДАЗН телеканалига берган интервюсида ҳакамлар ўйин натижасига таъсир ўтказганини ва Бавария жамоаси аниқ ноҳақликка учраганини таъкидлади. Ўйин якунига яқин Витинянинг жарима майдончаси ичидаги ҳаракати ҳам баҳсли вазиятларни янада кўпайтирди.
“Zamin”ни Telegram'да ўқинг!
