Техас автомобил транспорти департаменти (ДМВ) томонидан ишга туширилган янги платформа маълумотларига кўра, Ваймо компанияси штатда рўйхатдан ўтган 600 га яқин автоном транспорт воситаси билан етакчилик қилмоқда. Бу кўрсаткич унинг асосий рақобатчилари бўлган Авриде, Нуро, Tesla ва Зоох компанияларидан сезиларли даражада юқоридир. Бу ҳақда Techcrunch.com хабар беради.
28-майдан кучга кирган янги қонунга биноан, ҳайдовчисиз бошқариладиган автомобилларни синовдан ўтказаётган ёки улардан фойдаланаётган компаниялар ўз парки ҳажми ва хавфсизлик маълумотларини ДМВ билан бўлишиши шарт. Ҳозирда Алпҳабет таркибига кирувчи Ваймо Техасда 577 та автоном транспорт воситасини рўйхатдан ўтказган бўлса, Авриде 317 та, Нуро эса 47 та машинага эга.
Тижорий роботакси хизматларини таклиф қилаётган Tesla компанияси эса бор-йўғи 42 та автоном воситани рўйхатдан ўтказган. Гарчи Tesla ўтган йили Остинда ўз хизматини йўлга қўйган ва кейинчалик Даллас ҳамда Хюстонга кенгайганини эълон қилган бўлса-да, расмий рақамлар Ваймо билан ўртадаги фарқ жуда катта эканини кўрсатмоқда.
Шунингдек, Volkswagen шоъба корхонаси бўлган МОИА 12 та электр микроавтобус билан рўйхатдан ўтган. Таъкидлаш жоизки, парк ҳажми компаниянинг бозордаги ўрнини тўлиқ акс эттирмайди, чунки Нуро ва Зоох каби компаниялар ҳали тижорий фаолиятни бошламаган, Ваймо эса сув тошқинлари сабабли баъзи шаҳарларда фаолиятини вақтинча тўхтатган.
Юк ташиш соҳасида ҳам автоном технологиялар ривожланмоқда. Масалан, Aurora компанияси 91 та ҳайдовчисиз юк машинасига эга бўлса, унинг рақобатчилари Кодиак AI ва Вааби мос равишда 33 ва 13 та юк машинасини рўйхатдан ўтказган. Ўрта ҳажмли юк машиналарига ихтисослашган Гатик AI стартапи эса 64 та транспорт воситаси билан фаолият юритмоқда.
“Zamin”ни Telegram'да ўқинг!
