Келаси ойда тарихдаги энг йирик ИПЎни ўтказиши кутилаётган SpaceX компанияси Доналд Трумп маъмуриятидан улкан молиявий кўмак олди. Жума куни АҚШ Коинот кучлари (Спасе Форсе) SpaceX билан 4,16 миллиард долларлик шартнома имзоланганини эълон қилди. Ушбу маблағ президент Трумп томонидан “Олтин гумбаз” деб номланган ракета ва ҳаво ҳужумидан мудофаа тизими учун сунъий йўлдошлар қуришга йўналтирилади. Бу ҳақда Techcrunch.com хабар беради.
Ушбу келишув Elon Musk компанияси жорий ҳафтанинг бошида қўлга киритган 2,29 миллиард долларлик бошқа бир шартномадан сўнг амалга оширилди. Мазкур лойиҳа доирасида SpaceX Ернинг паст орбитасида махсус алоқа тармоғини барпо этиши кўзда тутилган. Кетма-кет имзоланган ушбу шартномалар компаниянинг давлат буюртмаларига қанчалик боғлиқлигини яна бир бор тасдиқламоқда.
Ўтган ҳафтада эълон қилинган ИПО ҳужжатларига кўра, SpaceX даромадларининг сезиларли қисми ҳукумат ҳисобига тўғри келади. Хусусан, 2025-йилда компания умумий тушумининг бешдан бир қисми айнан давлат агентликлари томонидан таъминланган. Elon Musk Трумпнинг сайловолди кампаниясига тахминан 300 миллион доллар сарфлаган бўлса-да, таҳлилчилар SpaceX сўнгги ўн йилликда коинотга учириш бозорида мутлақ етакчилик қилаётганини таъкидламоқда.
Шунга қарамай, компания ўз инвесторларини юзага келиши мумкин бўлган хавфлардан огоҳлантирди. ИПО аризасида қайд этилишича, SpaceX'нинг давлат тузилмалари билан ҳамкорлиги сиёсий ўзгаришлар, янги устуворликлар, тартибга солиш қоидалари ва молиялаштириш даражасининг ўзгаришига бевосита боғлиқ бўлиб қолмоқда.
“Zamin”ни Telegram'да ўқинг!
