“Instagram” фойдаланувчиларининг кўплиги бўйича “Twitter”дан ўзиб кетди

“Instagram” ижтимоий тармоғининг фаол фойдаланувчилари сони ойига 300 млн дан ошиб кетди. Бу кўрсаткич бўйича у “Twitter”дан ўзиб кетди, деб ахборот беради “Instagram”нинг бош директори Кевин Систром.

“Охирги тўрт йил ичида икки дўстнинг орзуси сифатида бошланган бу лойиҳа улкан глобал тармоққа айланди. Унда ҳар куни 70 млн дан ортиқ фотосурат ва видеолавҳалар чоп этилади”, – деб хабар беради Систром ўзининг тармоқдаги расмий блогида.

Систром шунингдек, яқин орада “Instagram”да машҳур инсонлар, спортчилар ва брендлар учун махсус аккаунтлар пайдо бўлишини қўшимча қилди.

“Instagram”га 2010 йилда асос солинган бўлиб, фотосуратлар ва видеолавҳалар билан ўзаро алмашиш учун мўлжалланган дастур. Ушбу компания 2013 йилнинг сентябрь ойида унинг фаол фойдаланувчилари сони ойига 150 млн ни, 2014 йилнинг мартида эса 200 млн ни ташкил қилаётгани ҳақида ахборот берган эди.

“Twitter”га 2006 йилда асос солинган, у қисқа хабарлар билан ўзаро алмашиниш учун мўлжалланган ижтимоий тармоқ. Ҳозирда унинг фаол фойдаланувчилари сони ойига 284 млн ни ташкил этмоқда.

манба: Kun.uz