Yevropa Ukrainadan mojaroni hal qilish uchun hududiy yon berishni talab qilmaydi

^{Suratda: (chapdan o‘ngga) Olaf Shols, Emmanuel Makron, Vladimir Zelenskiy, Mario Dragi va Klaus Yoxannis
Foto: Reuters}
Ukraina prezidenti Vladimir Zelenskiy, Fransiya prezidenti Emmanuel Makron, Germaniya kansleri Olaf Shols, Italiya bosh vaziri Mario Dragi va Ruminiya prezidenti Klaus Yoxannis Kiyevda uchrashdi.

Uchrashuv Ukrainaning YEI a’zoligiga nomzod sifatidagi maqomi bo‘yicha tavsiyanoma berish e’lon qilinishidan bir kun oldin bo‘lib o‘tdi (Yevrokomissiya ertaga, 17 iyun kuni tavsiyanoma berishini va’da qilgan). Yakuniy matbuot anjumanida Emmanuel Makron Kiyevda bo‘lgan Yevropa Ittifoqining to‘rtta yetakchisi ham Ukrainaga «zudlik bilan» YEI a’zoligiga nomzod maqomini berish g‘oyasini qo‘llab-quvvatlashini ma’lum qildi. Olaf Shols Ukrainaga YEIga to‘laqonli a’zo bo‘lish uchun «demokratiya va qonun ustuvorligi talablari bajarilishi kerakligini» ta’kidladi.

Yana bir mavzu harbiy yordam masalasi bo‘ldi. Emmanuel Makronning aytishicha, u Ukrainaga oltita Ceasar artilleriya tizimini yuborishni buyurgan. Unga ko‘ra, Yevropa Ukrainani g‘alaba qozonmaguncha qo‘llab-quvvatlaydi. Makron, shuningdek, Yevropa Ukrainadan mojaroni hal qilish uchun hududiy yon berishni talab qilmasligini qo‘shimcha qildi.

Ukraina prezidenti devoni xabariga ko‘ra, uchrashuv chog‘ida Yevropa yetakchilariga Rossiya Federatsiyasiga qarshi yangi sanksiyalar, jumladan gaz embargosi ​​bo‘yicha takliflar berilgan. “Zamin” yangiliklarini “Odnoklassniki”da kuzatib boring