Abdulaziz Komilov Afg‘onistonda muvaqqat hukumat TIV rahbari bilan uchrashdi

^{Foto: Afg‘oniston Tashqi ishlar vazirligi}
O‘zbekiston prezidentining tashqi siyosat masalalari bo‘yicha maxsus vakili Abdulaziz Komilov 19 iyun kuni Afg‘oniston poytaxti Kobul shahriga bordi. Bu haqda Afg‘onistonning muvaqqat hukumati Tashqi ishlar vazirligi xabar qildi.

^{Foto: Afg‘oniston Tashqi ishlar vazirligi}
Qayd etilishicha, u yerda muvaqqat hukumat TIV rahbari vazifasini bajaruvchi Amirxon Muttaqiy bilan uchrashuv o‘tkazilgan. TIV matbuot kotibi o‘rinbosari Hofiz Ziyi Ahmadning ma’lum qilishicha, O‘zbekiston delegatsiyasi tarkibida Afg‘oniston bo‘yicha maxsus vakil Ismatulla Ergashev ham bor.

^{Foto: Afg‘oniston Tashqi ishlar vazirligi}
Muzokarada savdo va tranzit sohasidagi ikki tomonlama munosabatlarni mustahkamlash va rivojlantirish masalalari ko‘tarilib, xavfsizlik bilan bog‘liq vaziyat muhokama qilingan. Shuningdek, Muttaqiy Abdulaziz Komilovni yangi lavozimi bilan tabriklagan.

«O‘zbekistonga afg‘onlar bilan siyosiy, iqtisodiy va gumanitar sohalardagi hamkorligi uchun minnatdorchilik bildiraman», — degan u.

^{Foto: Afg‘oniston Tashqi ishlar vazirligi}
Muttaqiy Afg‘oniston bo‘yicha iyul oyi oxirida Toshkentda bo‘lib o‘tadigan xalqaro konferensiyada ishtirok etish uchun taklif qilingan. Qo‘shni mamlakat hukumati O‘zbekistonga Savdo vazirligi vakillari boshchiligidagi delegatsiyani yuborish istagini bildirgan.

Eslatib o‘tamiz, iyul oyi oxirida Toshkent shahrida Afg‘oniston bo‘yicha oliy darajadagi xalqaro konferensiya bo‘lib o‘tadi. Tashqi ishlar vaziri vazifasini bajaruvchi Vladimir Norov bu haqda ma’lumot berib, hududdagi og‘ir iqtisodiy inqiroz va qiyin gumanitar vaziyat keskinligicha qolayotganini aytgan. “Zamin” yangiliklarini “Vkontakti”da kuzatib boring