Daniya Yevropa Ittifoqining mudofaa siyosatiga rasman qo‘shildi

^{Foto: Fotolia}
Daniya Yevropa Ittifoqining mudofaa siyosatiga qo‘shilgani haqida rasman e’lon qildi. Bu haqda YEI tashqi xizmati rahbari Jozep Borrel ma’lum qildi.

«Vazirlar bugun Daniyaning Yevropa mudofaa siyosatiga qo‘shilganini nishonlamoqda», — dedi Borrel Luksemburgdagi YEI tashqi ishlar vazirlari yig‘ilishida.

Daniya Yevropa Ittifoqining umumiy mudofaa va xavfsizlik siyosatini shakllantirishda ishtirok etmagan yagona a’zosi edi. Mamlakat bu pozitsiyani 30 yil davomida saqlab keldi. 1 iyun kuni bo‘lib o‘tgan referendumda daniyaliklarning uchdan ikki qismi mudofaa bandini bekor qilish uchun ovoz berdi, band Yevropa Ittifoqining mudofaa siyosatini shakllantirishda ishtirok etishdan bosh tortishni anglatar edi.

May oyi oxirida Yevropa Ittifoqi davlatlari mudofaa sohasiga sarmoya kiritishni oshirishga kelishib oldi. Jozep Borrelning aytishicha, mintaqada xavfsizlikni ta’minlash uchun YEI o‘z qurolli kuchlarini yaratishi kerak. Bu mavzu muhokamasi Rossiyaning Ukrainadagi harbiy amaliyoti fonida boshlandi. “Zamin” yangiliklarini “Telegram”da kuzatib boring