«Yevropa Ittifoqi va NATO Rossiya bilan urush qilish uchun koalitsiya yig‘moqda» — Lavrov

^{Foto: Reuters}
Rossiya tashqi ishlar vaziri Sergey Lavrov Yevropa Ittifoqi va NATO davlatlari Rossiya bilan urushga tayyorlanmoqda, deb hisoblaydi. Bu haqda u Bokudagi matbuot anjumanida ma’lum qilgan.

Lavrovning fikricha, «Yevropa Ittifoqining rusofobiyasi» uzoq kelajakda ham yo‘qolmaydi. Uning so‘zlariga ko‘ra, yevropaliklar Ikkinchi jahon urushi boshlanishini eslatuvchi yo‘lni tanlagan, o‘shanda «Gitler Sovet Ittifoqiga qarshi kurashish uchun Yevropa davlatlarining muhim qismini, balki ko‘p qismini o‘z bayrog‘i ostida to‘plagan edi».

«Hozir ham, shu jumladan Yevropa Ittifoqi, NATO bilan birgalikda Rossiya Federatsiyasi bilan kurashish va umuman olganda, urush qilish uchun shunday zamonaviy koalitsiyani yig‘moqda. Bularning barchasini diqqat bilan ko‘rib turibmiz», — dedi Lavrov.

Vazirning qo‘shimcha qilishicha, Rossiya rasmiylari «Yevropa Ittifoqining xatti-harakatlarini kuzatmoqda» hamda ularning Ukraina va Moldovaga ittifoq a’zoligiga nomzod maqomini berganidan so‘ng tashlaydigan qadamlariga yarasha chora ko‘radi.

23 iyun kuni YEI davlatlari rahbarlari sammit chog‘ida Ukraina va Moldovaga YEIga nomzod maqomini berishga kelishib oldi. Ukraina prezidenti Vladimir Zelenskiy a’zolikka nomzod uchun tegishli arizani Rossiyaning Ukrainaga bosqini boshlanganidan bir necha kun o‘tib bergan edi. Iyun oyida Rossiya prezidenti Vladimir Putin Rossiya Ukrainaning YEIga kirishiga qarshi emasligini aytgan. “Zamin” yangiliklarini “Youtube”da kuzatib boring