Millionlarni qayg‘uga solgan fojia. Malika Diananing bevaqt o‘limiga 25 yil to‘ldi (video)

^{Foto: Hull Daily Mail}
2022 yilning 31 avgustida malika Diananing vafotiga chorak asr to‘ladi, u baxtsiz hodisa oqibatida atigi 36 yoshida yorug‘ olamni tark etgandi.

Malika Diananing bevaqt o‘limi nafaqat qirol oilasi a’zolari, balki butun dunyo uchun kutilmagan voqea bo‘ldi. 1997 yil 31 avgustda Parijda oddiy insonlar kabi qalbga ega Diana va milliarderning o‘g‘li Dodi Al-Fayed ishtirokida baxtsiz hodisa yuz bergan edi. Juftlik o‘tirgan mashina haydovchisi suratkashlardan qochish maqsadida tezlikni oshirgan va boshqaruvni yo‘qotib, Alma ko‘prigi yaqinidagi tunnel tayanchiga borib urilgan. Shahzoda Charlzning sobiq rafiqasi Diana hamda uning do‘sti Dodi Al-Fayed ham og‘ir tan jarohati tufayli vafot etgan.

Buyuk Britaniya bosh vaziri Toni Bler Diananing vafotini e’lon qilganida butun dunyoda millionlab odamlar «xalq malikasi» uchun motam tutgan. Uning o‘limi hech kimni befarq qoldirmagan.

Diana 1981 yilda Charlz bilan turmush qurish orqali mashhurlikka erishgandi, ammo er-xotinning munosabatlari juda yomon edi. 1996 yilda ular rasman ajrashdi, bu Diananing fojiali o‘limidan bir yil oldin sodir bo‘ldi.

Qirollik a’zolari Dianani eslab haligacha qayg‘uga cho‘madi, ayniqsa uning ikki o‘g‘li — 40 yoshli shahzoda Uilyam va 37 yoshli Garri onasining o‘limidan keyingi qalb jarohatlari yillar davomida ruhiy salomatligiga qanday ta’sir qilgani haqida gapiradi.

Diana vafot etgan paytda shahzoda Uilyam 15, Garri esa 12 yoshda edi. Ular London ko‘chalari bo‘ylab onasining tobuti ortidan odamlar yonida yurib, uning dafn marosimida qatnashgan.

Shahzoda Charlz sobiq xotinining o‘limidan so‘ng asta-sekin odatiy hayotga qaytdi va 2005 yilda Kamilla bilan turmush qurdi. “Zamin” yangiliklarini “Vkontakti”da kuzatib boring