Foto: Daily sabah
Dyusseldorfning janubi-g‘arbidagi Lyutserat qishlog‘ida hududdan qo‘ng‘ir ko‘mir qazib olish uchun foydalanishga qarshi chiqqan politsiya va atrof-muhit faollari o‘rtasida to‘qnashuvlar yuz berdi.
Dyusseldorfdan (Shimoliy Reyn-Vestfaliya) 40 kilometr janubi-g‘arbda joylashgan Lyutserat qishlog‘i aholisini yakuniy ko‘chirish arafasida Germaniyadagi eng yirik qo‘ng‘ir ko‘mir konlaridan biri - Garsvayler karerining o‘zlashtirilishi munosabati bilan politsiya va atrof-muhit faollari o‘rtasida to‘qnashuvlar bo‘lib o‘tdi. 2 yanvar, dushanba kuni huquq-tartibot idoralari vakili jamoat tartibini buzish moddasi bo‘yicha jinoyat ishi qo‘zg‘atilganini ma’lum qildi.
Bungacha «Lützerath lebt» («Lyutserat tirik») tashabbusi faollari yo‘llarni to‘sib, bo‘m-bo‘sh uylarda barrikada o‘rnatgan, shuningdek, to‘siqlarga o‘t qo‘ygan.
Politsiyaning ta’kidlashicha, gap hali yanvar oyi o‘rtalariga rejalashtirilgan va faollarni chiqarib yuborishni nazarda tutuvchi to‘liq ko‘chirish boshlanishi haqida emas, balki unga tayyorgarlik haqida borgan.
«Alle Dörfer Bleiben» («Barcha qishloqlar qoladi») tashabbusi vakili Ante Bussberg: «Lyutserat yaqinida ko‘mir qazib olinmasligi kerak» dedi.
RWE energetika kompaniyasi, o‘z navbatida, shunday bayonot berdi: «Bu qishda sobiq aholi punktidan foydalanish (hududdan) energiya inqirozi sharoitida elektr stansiyalarini ishonchli ta’minlashni kafolatlash uchun zarur». «Lyutseratda yashaganlarning barchasi qishloqni tark etishdi», deya qo‘shimcha qildi kompaniya.
Aholi punkti hududi, shuningdek, Reynland-Pfalsning ushbu hududidagi uylar Garsvayler kompaniyasini boshqaradigan RWE korporatsiyasi nazorati ostiga o‘tdi.
Xaynsberg okrugi aholining hududga kirishini taqiqlovchi farmon chiqardi. Agar buyruq bajarilmasa, bu «10 yanvardan boshlab chiqarib yuborish choralarini ko‘rish uchun» asos bo‘lib xizmat qiladi, deyiladi okrug bayonotida.
Shimoliy Reyn-Vestfaliya va umuman Germaniyada ko‘mirni bosqichma-bosqich to‘xtatish bo‘yicha bahs-munozaralar fonida Lyutserat va uning atrofidagi boshqa kichik hududlarning taqdiri uzoq vaqtdan beri siyosatchilar va iqlim faollari o‘rtasidagi keskin mojarolar markazida bo‘lib kelgan. So‘nggi paytlarda Rossiyaning Ukrainaga qarshi tajovuzkor urushi bilan bog‘liq energetik inqiroz tufayli kelishmovchiliklar kuchaygan.
Shimoliy Reyn-Vestfaliyadagi oxirgi RWE qo‘ng‘ir ko‘mir yoqilg‘isi elektr stansiyalari 2030 yil 31 martda yopiladi. Germaniya hukumati tomonidan ishlab chiqilgan tegishli qonun 2022 yil 2 dekabrga o‘tar kechasi Bundestag tomonidan qabul qilingan. Uni 525 deputat qo‘llab-quvvatladi, 92 nafari qarshi chiqdi, yana ikki deputat betaraf qoldi.
Shu bilan birga, 2022 yil oxirida yopilishi kerak bo‘lgan Neurath elektr stansiyasining D va E ikkita qo‘ng‘ir yoqilg‘i blokining ishlash muddati 2024 yil mart oyi oxirigacha uzaytirildi.
Federal miqyosda qo‘ng‘ir ko‘mir qazib olish dastlab rejalashtirilganidek, 2038 yilgacha davom etishi kerak. Bu, xususan, Germaniyaning sharqiy qismidagi qo‘ng‘ir ko‘mirdan ishlaydigan elektr stansiyalariga tegishli.
Ctrl
Enter
Xato topdIngizmi
Iborani ajratib Ctrl+Enter tugmasini bosingMavzuga oid yangiliklar
