Agar AQSH yordam ajratmasa, Ukrainada “B” rejasi bormi?

^{Foto: Google Images}
Ukraina prezidenti Vladimir Zelenskiy, agar AQSH yordam ajratishga rozi bo‘lmasa, Ukraina rasmiylari muqobil yechimlarni izlashga majbur bo‘lishini aytdi. U Fox News jurnalistining AQSH harbiy yordamdan bosh tortgan taqdirda Ukrainada “B” reja bormi, degan savoliga shunday javob berdi.

“Biz omon qolishimiz kerak. Biz ba’zi parallel qadamlarni aniqlab olishimiz kerak, ammo, bilasizki, bu yordam juda muhim. AQSH yordamisiz ko‘proq askarlarimizni yo‘qotamiz, chunki agar sizda himoya va artilleriya bo‘lmasa, albatta, odamlar ko‘proq qurbon bo‘ladi”, — dedi Vladimir Zelenskiy.

U agar AQSH yordam ajratmasa, Ukraina qanday muqobil variantlardan foydalanishi mumkinligini muhokama qilishdan bosh tortdi, deya qayd etadi Fox News.

Bir kun avval Ukraina tashqi ishlar vaziri Dmitriy Kuleba, agar Ukraina armiyasi o‘z vaqtida o‘q-dorilarni olganida, mamlakat qurolli kuchlari Avdeyevkani tark etishga majbur bo‘lmas edi, degan edi. Uning so‘zlariga ko‘ra, ukrainaliklar o‘z jonlarini qurbon qilishga majbur, chunki “kimdir hali ham yordam ajratish bo‘yicha qarorni muhokama qilmoqda”.

2023 yil oktyabr oyidan beri AQSH Kongressida Ukrainaga mablag‘ ajratish to‘g‘risidagi qonun loyihasi muhokama qilinmoqda. 13 fevral kuni Senat Ukraina, Isroil va Tayvanga 95 milliard dollardan ortiq yordam ajratish to‘g‘risidagi qonun loyihasini qo‘llab-quvvatladi (shundan 60 milliard dollardan ortig‘i Kiyevga ajratiladi).

Endi hujjat respublikachilar nazoratidagi Vakillar palatasi tomonidan tasdiqlanishi kerak. Kongress Quyi palatasi spikeri Mayk Jonson janubiy chegara xavfsizligini mustahkamlash choralarini ko‘rib chiqmasdan oldin qonun loyihasini ovozga qo‘yishdan bosh tortdi. “Zamin” yangiliklarini “Telegram”da kuzatib boring