Erdo‘g‘on Zelenskiyga Ukrainada o‘t ochishni to‘xtatishga va’da berdi

^{Foto: @RTErdogan / Twitter}
Turkiya prezidenti Rajab Toyyib Erdo‘g‘on Nyu Yorkda Vladimir Zelenskiy bilan bo‘lib o‘tgan muzokarada Anqara Ukrainada g‘alla kelishuvini qayta tiklash va o‘t ochishni to‘xtatish uchun harakat qilishini ma’lum qildi.

BMT Bosh assambleyasining 79-sessiyasida ishtirok etish uchun AQSHga tashrif buyurgan Erdo‘g‘an va Zelenskiy uchrashuvi Nyu Yorkdagi “Turk uyi”da bo‘lib o‘tgan.

Qayd etilishicha, uchrashuvda Turkiya va Ukraina o‘rtasidagi ikki tomonlama munosabatlar, urush va tinchlik sa’y-harakatlari, mintaqaviy va global muammolar muhokama qilingan. Shuningdek, Erdo‘g‘on Turkiyaning Ukraina—Rossiya urushini muloqot orqali, Ukrainaning hududiy yaxlitligi va suverenitetini himoya qilgan holda tugatish mumkinligiga har doim ishonganini aytgan.

Turkiya rahbarining idorasi mamlakat ushbu maqsadga erishish uchun sa’y-harakatlarini davom ettirishini ta’kidlagan.

“Prezident Erdo‘g‘on Turkiya adolatli va mustahkam tinchlikka erishish uchun vositachilikni o‘z ichiga olgan barcha choralarni ko‘rishga tayyorligini va Qora dengiz don tashabbusini jonlantirish hamda Ukraina va Rossiya o‘rtasida o‘t ochishni to‘xtatishga erishish uchun sa’y-harakatlar davom etishini aytdi”, deyiladi xabarda. “Zamin” yangiliklarini “Vkontakti”da kuzatib boring