Kilian Mbappe jinsiy zoʻravonlikda gumonlanmoqda

^{Lars Höglund / TT / Scanpix / LETA}
Futbolchining oʻzi bu ish ortida oʻzi bilan sudlashayotgan sobiq klubi turganini aytmoqda. Jurnalistlardan biri unda alkogol bilan bogʻliq muammo ham borligini aytgan. Bu haqda hozirgacha nimalar ma'lum?

Shvetsiya politsiyasi Stokholm markazidagi mehmonxonada zoʻravonlik roʻy bergani haqidagi shikoyatni tekshirmoqda. Mahalliy mediaga koʻra, gumonlanuvchi — «Real»ning frantsiyalik hujumchisi Kilian Mbappedir. Quyida ushbu hodisa haqida hozirgacha ma'lum boʻlgan ma'lumotlar keltiriladi.

U bu joyga qanday qilib borib qolgandi?

Hujumchi sentyabr oyida son sohasidagi mushaklarini jarohatlab olgandi. 5 oktyabr kuni Kilian «Vilyarreal»ga qarshi oʻyinning boshlangʻich tarkibida maydonga tushdi, ammo Frantsiya milliy jamoasi bosh murabbiyi Dide Desham uni FIFA kunlaridagi tanaffus vaqtida jamoaga chaqirmadi — «Real» jarohatidan toʻliq tuzalishi uchun Mbappega dam berishni soʻragan. Bundan tashqari, Kilianning oʻzi jamoa usiz ham uddalaydigan oʻyinlarda kuch yoʻqotmaslikni istayotgani haqida mish-mishlar chiqqan.

11 oktyabr kuni Sportbladet nashri Frantsiya milliy jamoasi oʻyini vaqtida futbolchini Stokholmdagi tungi klublardan birida koʻrishgani haqida yozdi. U bu erga sheriklari bilan taksida kelgan, VIP-kirish orqali yurgan va oʻzini sezdirmaslikka (shapka, niqob) harakat qilgan.

Keyin RMC Sport ayrim tafsilotlarni ochiqladi: Mbappe tungi klubga borishdan oldin mahalliy restoranlardan birida boʻlgan. Xabar qilishlaricha, mashgʻulotlar qayta boshlanishidan oldin bir necha kunlik ta'til olgani tufayli «Real» unga Shvetsiyaga borishga ruxsat bergan. Kilianga boʻlajak oʻyinlarga yaxshiroq tayyorgarlik koʻrishi uchun individual dastur ham yuborishgan.

Frantsuz futbolchisi darhol qarindoshlari va «PSJ»dagi jamoadoshi, hozirda ijara asosida «Bayer»da toʻp surayotgan Nordi Mukiele bilan birgalikda Stokholmga uchadi. Expressen gazetasi yozishicha, Mbappe Shvetsiya poytaxtiga xususiy samolyotda 9 oktyabr kuni borgan va tungi klubga kirgan. Keyingi kuni u yana oʻsha erda boʻladi va 11 oktyabr kuni Korsikaga qaytadi.

«Asosli gumonlanuvchi»

Ehtimoliy jinoyat 10 oktyabr kuni — Frantsiyaning Millatlar ligasi doirasida Isroilga qarshi oʻyini kunida sodir etilgan. Politsiyaga ikki kun oʻtib murojaat qilgan va Mbappe tergovga tortilgan. Aftonbladet nashriga koʻra, tergovchilar Stokholmda futbolchi doʻstlari bilan tunagan mehmonxonaga borishgan — jinsiy zoʻrlash aynan shu erda sodir etilgan.

Shvetsiya prokuraturasi yulduzli futbolchining nomini tilga olmagan, ammo mahalliy TV4 telekanali xabar berishicha, tergov harakatlari aynan unga nisbatan olib borilmoqda: jabrlanuvchi Kilian tomonidan jinsiy zoʻravonlikka uchraganini aytgan. U shifoxonaning maxsus boʻlimiga yordam soʻrab murojaat qilgan.

Hozirda futbolchi «asosli gumonlanuvchi» sifatida belgilangan. Bu mahalliy politsiyada gumonlanuvchilarning eng past darajasi. Ammo istalgan pallada bu yomon tomonga oʻzgarishi mumkin.

Kilian bu xabarlarni feyk deb atadi va «PSJ» nayrangiga ishora qildi

Mbappening oʻzi zoʻrlashda gumonlanayotgani toʻgʻrisidagi xabarlarga darhol reaktsiya qildi va bu xabarlar sobiq klubi tomonidan tarqatilayotganiga ishora qildi.

«Feyk yangiliklar. Buni oldindan aytish mumkin edi. [Bu haqda klub bilan shartnoma boʻyicha] sud majlisidan bir kun oldin yoza boshlashdi — xuddi tasodifdek, shunday emasmi?» — deya yozgan u ijtimoiy tarmoqda.

Futbolchi bu bilan oʻzi va «PSJ» oʻrtasida 55 million evro miqdoridagi qarzdorlik (bonuslar va toʻlanmagan maosh) boʻyicha sud ishini nazarda tutgan, hujumchi sobiq klubi uch oylik maoshini bermaganini aytgan; sentyabrda Frantsiya ligasi klubga qarzni toʻlash majburiyatini yuklagandi, shundan keyin «PSJ» apellyatsiya bergandi. Bu boʻyicha navbatdagi eshituv 15 oktyabrga belgilangandi.

Futbolchining advokati Mari Alis Kanyu-Bernar AFP bilan suhbatda Mbappe tuhmat yuzasidan shikoyat qilishini aytgan.

Mahalliy nashrlar Mbappening soʻzlarini kinoya bilan kutib olgan. Parijdagi L'Équipe gazetasi oʻz materiallaridan birida «PSJ»ning sobiq futbolchisiga shunday masxara qilgan: «Mbappe uchun barchasiga «PSJ» aybdor. «Real» safida faqat penaltidan gol uryaptimi? Aybdor «PSJ». Frantsiya milliy jamoasiga chaqirilmadimi? Aybdor «PSJ». Shvetsiyada qoʻlga tushdimi? Aybdor «PSJ».

Nashrning klubdagi manbasi «PSJ» rahbariyati bundan qattiq ajablanganini bildirgan: «Toʻgʻrisi, bu sharmandalik. Biz Kilian soʻzlarini e'tiborsiz qoldiramiz va yuzimizni saqlab qolamiz».

Manbaning aytishicha, klubdagilar Kilian reaktsiyasidan hayratda qolishgan. Va u nega zoʻravonlik boʻyicha yolgʻon ayblov ortida «PSJ» turganiga bunchalik ishonchi komil ekanini tushunishmayapti. Klubdagilar sud shusiz ham ular tomonida ekaniga amin.

«Real»dagilar qanday reaktsiya qilishdi?

15 oktyabr kuni RMS Sport ispan klubidagilar hodisadan tashvishda emasligi va ma'lumotni yolgʻon deb hisoblayotganini xabar qildi. «Real» vakillari fikricha, bu mish-mishlar 25 yoshli frantsuzning obroʻsiga zarar etkazish uchun tarqatilmoqda.

Ammo shundan keyin gʻalati holat kuzatildi: qaymoqranglilar klubi ijtimoiy tarmoqlardagi sahifasida Artist Pack kollektsiyalari reklamasi aks etgan fotosuratni joylashtirdi. Unda esa Kilian tushirib qoldirilgan. Shu bilan birga, Jud Bellinghem oʻz akkauntida joylashtirgan xuddi shu suratda Mbappe borligini koʻrish mumkin.

Shu bilan birga, bu Kilian Nike bilan shartnoma tuzganiga bogʻliq boʻlishi ham mumkinligi taxmin qilinmoqda.

Keyinroq klub bu mojaro yuzasidan shoshilinch yigʻilish oʻtkazgani xabar qilindi. Hozircha futbolchi jamoaning yaqin vaqtlar ichidagi oʻyinlarida qatnashishi noma'lum. «Real» hozirga qadar bu masala yuzasidan rasmiy bayonot bergani yoʻq.

Alkogol bilan ham muammo bormi?

Shu kunlarda jurnalist Romen Molina olovga moy sepdi. U shov-shuvli insayd bilan chiqish qildi — uning aytishicha, Mbappe klublar va boshqa koʻngilochar maskanlarga tez-tez tashrif buyuradi, natijada unda ruhiyat va alkogol bilan bogʻliq muammolar yuzaga kelgan.

Kilianning oʻzi hozircha bu ma'lumotga hech qanday munosabat bildirmadi. “Zamin” yangiliklarini “Telegram”da kuzatib boring