AQSHdagi shov-shuvli qotillikni sodir etishda gumonlangan shaxs qo‘lga olindi

^{Foto: Business Insider}
AQSH politsiyasi UnitedHealthcare tibbiy sug‘urta kompaniyasining ijrochi direktori Brayan Tompsonni o‘ldirishda gumonlangan shaxsni qo‘lga oldi, deb xabar beradi CNN.

Nyu-York politsiya komissari Jessika Tishning ma’lum qilishicha, 26 yoshli Luiji Manjione noqonuniy qurol saqlash ayblovi bo‘yicha qo‘lga olingan. Manjione «Brayan Tompsonni o‘ldirishda» gumonlanmoqda.

Nyu-York meri Erik Adamsga ko‘ra, qo‘lga olingan shaxs politsiya tomonidan qidiruvda bo‘lgan insonning «ta’rifiga mos keladi». «Shuningdek, [gumonlanuvchining] yonidan uni qotillik holatiga bog‘lashi mumkin bo‘lgan bir nechta buyumlar topilgan», — deydi mer.

Qo‘lga olingan shaxsning yonida «korporativ Amerika» haqida salbiy fikr bildirgan muallifning qo‘lyozmasi topilgani aytilmoqda. Hujjatni ko‘rgan politsiyachi undan ikkita iqtibos keltirgan: «Bu parazitlar shunday yo‘l tutdi» hamda «Har qanday bahs va jarohatlar uchun kechirim so‘rayman, ammo bu sodir bo‘lishi kerak edi».

CBS News o‘zining tergovga yaqin manbasiga tayanib yozishicha, Tompsonni o‘ldirishga gumonlanayotgan shaxs Altunada hibsga olganidan keyin, Pensilvaniya rasmiylari tomonidan so‘roi qilingan. Manbaning so‘zlariga ko‘ra, qo‘lga olingan shaxsning yonidan ovoz so‘ndirgichga ega pistolet topilgan — bu Tompson o‘ldirilgan qurolga mos keladi.

Nashrning huquq-tartibot organlaridagi ikki manbasini aytishicha, «Makdonalds» restoraniga tashrif buyurgan mijozlardan biri Nyu-York politsiyasi tomonidan qidirlayotgan erkakka o‘xshash shaxsga duch kelganidan keyin Pensilvaniya politsiyasiga qo‘ng‘iroq qilgan. Hozirda tergovchilar uning Brayan Tompsonga uyushtirilgan suiqasdga aloqadorligini isbotlash uchun ish olib bormoqda.

4 dekabr kuni Manxettenda 2023 yilda daromadi 281 mlrd dollarni tashkil etgan UnitedHealthcare sug‘urta kompaniyasining ijrochi direktori Brayan Tompson otib ketilgandi. Politsiya qotilni bir necha kundan beri qidirib kelayotgan, jinoyatchi haqida ma’lumot berganlarga 10 ming dollar va’da qilingan edi.

Yangiliklar