15:01 / 25.12.2024

Qozogʻistonda samolyot qulashiga oid soʻnggi ma'lumotlar...

^{Foto: “TASS”}
Bokudan Grozniyga uchayotgan Embraer 190 yoʻlovchi samolyoti 25 dekabr kuni Qozogʻistonning Aqtau shahrida qulab tushdi. Samolyot Azerbaijan Airlines aviakompaniyasiga tegishli boʻlib, bortida 69 kishi, jumladan, 5 nafar ekipaj a'zosi boʻlgan.

Grozniy aeroporti matbuot xizmatiga koʻra, Bokudan uchgan samolyot Grozniydagi tuman tufayli Maxachqal'aga, keyin esa Aqtauga yoʻnaltirilgan. Samolyot halokatga uchrashiga qushlar galasi bilan toʻqnashuv sabab boʻlgan boʻlishi mumkin. Guvohlar qulagan samolyot bortida kislorod balloni portlab ketgani, odamlar hushini yoʻqota boshlaganini aytmoqda.

Qozogʻiston Transport vazirligi ma'lum qilishicha, bortda 37 nafar Ozarbayjon, 6 nafar Qozogʻiston, 3 nafar Qirgʻiziston, 16 nafar Rossiya fuqarosi boʻlgan. Soʻnggi ma'lumotlarda 29 kishi omon qolgani, 20 dan ortiq odam kasalxonadaligi ma'lum. Checheniston rahbari Ramzan Qodirov qurbonlarning oilasiga hamdardlik bildirib, tirik qolgan 12 kishi ogʻir ahvoldaligini aytgan.

^{Foto: Tengrinews}
Qozogʻiston prezidenti Qosim-Joʻmart Toʻqaev samolyot halokatini tekshirish boʻyicha komissiya tuzishni buyurgan. Unga bosh vazir oʻrinbosari Bozumbaev rahbarlik qiladi. Toʻqaev, shuningdek, jabrlanganlarga yordam koʻrsatish uchun Ostonadan Aqtauga shifokorlarni yuborishni buyurgan.

Ozarbayjon prezidenti Ilhom Aliev aviafojia munosabati bilan Rossiyadagi MDH sammitiga qatnashmay Bokuga qaytgan. U ham qurbonlarning yaqinlariga hamdardlik bildirmoqda.

Qozogʻistonda AZAL samolyoti halokatga uchraganini chuqur qaygʻu bilan qabul qildim. Ushbu voqea oqibatida jabrlanganlar va ularning yaqinlari bilan birgamiz, degan u.

Ilhom Aliev topshirigʻiga binoan raqamli rivojlanish va transport vaziri, favqulodda vaziyatlar vaziri, bosh prokuror oʻrinbosari, sogʻliqni saqlash vaziri oʻrinbosari, Fuqaro aviatsiyasi davlat agentligi direktori oʻrinbosari, AZAL vitse-prezidenti va boshqa tegishli davlat organlari vakillari voqea joyini oʻrganish uchun Qozogʻistonning Aqtau shahriga yoʻl olishdi.