Suriyadagi HTSh rahbari guruhni tarqatib yuborish rejasini ma'lum qildi

^{Ahmad ash-Sharaa (Abu Muhammad al-Joʻlaniy nomi bilan mashhur)}
Suriyada hokimiyat tepasiga kelgan «Hay'at Tahrir ash-Shom» (HTSh) guruhi rahbari Ahmad ash-Sharaa Milliy konferentsiya davomida guruh tarqatib yuborilishini e'lon qilishini aytdi. Shu bilan birga, mamlakatda qonuniy saylovlarni oʻtkazish toʻrt yilga choʻzilishi mumkin, dedi u Al-Arabiya telekanali bilan suhbatda.

Ahmad ash-Sharaa (Abu Muhammad al-Joʻlaniy nomi bilan mashhur) saylovlardan oldin aholini roʻyxatga olish jarayoni oʻtkazilishi kerakligini tushuntirdi. Uning soʻzlariga koʻra, yangi Konstitutsiyani ishlab chiqish uch yilgacha davom etadi. Shu bilan birga, Suriyaning yangi hukumati rahbari mamlakat aholisi bir yil ichida ijtimoiy sohada ijobiy oʻzgarishlarni koʻrishiga va'da berdi.

Ash-Sharaa oʻtish davri ma'muriyati AQSh tomonidan qoʻllab-quvvatlanayotgan va kurdlardan iborat Suriya demokratik kuchlari (SDF) bilan mamlakat shimoli-sharqidagi inqirozni hal qilish boʻyicha muzokaralar olib borayotganini tasdiqladi. Natijada SDF milliy qurolli kuchlar tarkibiga qoʻshilishi kerak. U kurdlar Suriya tuzilmasining ajralmas qismi ekanini tasdiqlab, boʻlinish boʻyicha har qanday rejalarni rad etdi.

«Suriya boʻlinib ketmaydi», deb ishontirdi Ash-Sharaa.

Shu bilan birga, Ash-Sharaa, Bashar Asadni hokimiyatdan agʻdargan va unga asosiy muxolifat boʻlgan «Hay'at Tahrir ash-Shom» guruhining tarqatib yuborilishi Milliy muloqot konferentsiyasida e'lon qilinishini aytdi.

HTSh boshchiligidagi islomiy guruhlar noyabr oyi oxirida Suriyada hujum boshladi. Ikki hafta oʻtgach, ular mamlakat poytaxtiga kirib, hokimiyatni egallab oldi. Prezident Bashar Asad esa Rossiyaga qochdi. “Zamin” yangiliklarini “Telegram”da kuzatib boring