KXDR «sosiskali shoʻrva» uchun odamlarni lagerlarga yuborishni boshladi

^{Foto: AP}
Shimoliy Koreyada kelib chiqishi Janubiy Koreyadan boʻlgan budae-jige (sosiskali shoʻrva) tayyorlash taqiqlandi. Taqiqni buzganlar mehnat lagerlariga yuborilishi mumkin, deb yozdi The Sun shimoliy Yangan viloyatidagi bozor ishchisiga tayanib.

Budae-jige - Janubiy Koreyada ixtiro qilingan va juda mashhur boʻlgan sosiskali, goʻshtli va noʻxotli achchiq lagʻmon. 2017 yilda bu shoʻrva Shimoliy Koreyaga kirib bordi va tezda mashhur boʻldi.

Biroq, 2024 yilda Pxenyan budae-jigeni Janubiy Koreyadan kelib chiqqanligi sababli tayyorlashni taqiqladi. Uni koʻchada sotgan yoki uyda pishirgan har bir kishi mehnat lageriga tushib qolish tahdidi ostida qoladi.

«Bozorda budae-jige sotilishi toʻxtatildi. Politsiya va bozor ma'muriyati shoʻrvani sotayotganda qoʻlga tushganlar yopilishini aytdi», dedi sotuvchi ayol.

Shimoliy koreyaliklar dunyoning qolgan qismida ruxsat berilgan boshqa narsalar uchun ham jazolanishi mumkin. Masalan, yaqinda rasmiylar mamlakatda nikohdan ajrashish uchun qoʻllanadigan jazoni sezilarli darajada kuchaytirgan. Jumladan, ajrashish toʻgʻrisida ariza berilgandan soʻng, er-xotin 1 oydan 6 oygacha qamoq jazosiga hukm qilinadi.

«Men Kimjongsuk okrugi xalq sudiga bordim... u erda 12 oila ajrashishi toʻgʻrisida qaror qabul qilindi. Hukm chiqarilgandan soʻng, ular darhol tuman mehnat lageriga oʻtkazildi», dedi oʻz ismini oshkor qilishni istamagan Yangan viloyatida yashovchi fuqaro.

Ayolning aytishicha, 2020 yildan beri ajrashishlar soni tez sur'atlar bilan oshgan. COVID-19 pandemiyasi boshlanishi bilan butun mamlakat qamalga tushdi va koʻpchilik oilalarga pul topish juda qiyin boʻldi. Yomon iqtisodiy sharoitlar koʻplab nikohlarning buzilishiga olib keldi. Er-xotinlarning ajrashishlariga yoʻl qoʻymaslik uchun hukumat ajrashganlarni jazolay boshladi. “Zamin” yangiliklarini “Telegram”da kuzatib boring