19:46 / 02.02.2025

Rossiya harbiylari Ukrainaning bir qancha hududlari boʻylab havo zarbalari yoʻlladi

1 fevral tongida Rossiya harbiylari Ukrainaning bir qancha hududlari boʻylab havo zarbalari yoʻlladi. Raketalar va dronlar Poltava, Xarkiv va Zaporijjyadagi turar joylarga zarar etkazgan. Zaporijjya, Odessa, Sumi, Xmelniskaya va Kiyev oblastlari ham zarbalar ostida qolgan.

Poltavada Rossiya raketasi besh qavatli uyga kelib urilishi oqibatida halok boʻlganlar soni 14 kishiga etdi, ular orasida ikki bola ham bor, deb xabar bergan Ukraina favqulodda vaziyatlar boʻyicha davlat xizmati.

^{Ukrainalik qutqaruvchilar Poltavada Rossiya raketasi kelib tushgan turar joy atrofida. 2025 yil 1 fevral
Sofiia Gatilova / Reuters / Scanpix / LETA}
Yana 17 kishi jarohatlangan, ulardan toʻrt nafari bolalar, deyiladi FVDX xabarida. 22 kishi xarobalar orasidan chiqarib olingan.

Qurbonlardan biri — aktrisa Anastasiya Kolvax. Bu ma'lumotni u ishlagan «Zamonaviy muloqot teatri» tasdiqlagan.

Tarqalgan foto va videolarda zarba besh qavatli uyning pod'ezdini toʻliq yakson etganini koʻrish mumkin. Xarobalar ostida odamlar qolayotgan boʻlishi mumkin.

Vayronalarni tozalash va qutqaruv ishlari davom ettirilmoqda. Voqea joyida 460 dan ortiq qutqaruvchi, kuchishlatar tuzilmalar va kommunal xizmatlar xodimlari ishlamoqda.

«Qurbonlarning yaqinlariga hamdardlik bildiraman. Voqea joyida barcha zarur xizmatlar ish olib bormoqda, qutqarishmoqda va zarur yordamlar koʻrsatilmoqda», — deya Poltavadagi voqealarga munosabat bildirgan prezident Volodimir Zelenskiy.

Zelenskiy bu zarbalarni «navbatdagi terrorchilik jinoyati» deb atagan va yana bir bor gʻarblik hamkorlarni mamlakatni qoʻllab-quvvatlashni kuchaytirishga, jumladan, qoʻshimcha havo hujumidan mudofaa vositalari etkazib berishga chaqirgan.

Poltava boʻylab zarbalar shanbaga oʻtar kechasi boshlanib, tongga qadar davom etgan, butun Ukraina boʻylab dronlar va raketalar orqali yopirilma hujum uyushtirilganida roʻy bergan.

Rossiya qoʻshini bu vaqt davomida Poltava oblastiga bir necha bor hujum uyushtirgan.

Poltava oblasti harbiy ma'muriyati Mirgorod rayonidagi energetika infratuzilmalari shikastlangani, natijada 160 dan ortiq xonadon elektr ta'minotidan uzilganini ma'lum qilgan.

^{Mahalliy aholi vakillari Poltavaga raketa zarbasi oqibatlari bartaraf etilishi jarayonini kuzatmoqda
Sofiia Gatilova / Reuters / Scanpix / LETA}

^{Ukrainalik qutqaruvchilar Rossiya raketasi Poltavadagi koʻp qavatli uyga kelib urilishi oqibatida halok boʻlgan kishi jasadi bilan
Sergey Bobok / AFP / Scanpix / LETA}