Investorlar AQSHdan ommaviy tarzda pul olib chiqmoqda — iqtisodiyot muzlab qolish arafasidami?

Amerikada xavfli (junk) obligatsiya va kreditlarga sarmoya kirituvchi fondlar so‘nggi haftada misli ko‘rilmagan chiqimni boshidan kechirdi.

Financial Times ma’lumotlariga ko‘ra, faqat bir haftada AQSH fondlaridan 16 milliard dollar pul qaytarib olindi. Bu – JPMorgan ta’rificha, rekord darajadagi ko‘rsatkich.

“Tramp bojlari” sarmoyadorlarni xavotirga soldi
Investorlar chiqishi 2 aprelda Tramp tomonidan e’lon qilingan yangi tariflar fonida boshlandi. Unga ko‘ra, AQSH asosiy savdo hamkorlariga, xususan Xitoy tovarlariga 145 foizgacha boj joriy etishni rejalashtirmoqda.

Qisqa muddatlik barqarorlik 10 apreldagi "tariflar kechiktiriladi" degan xabarlar bilan tiklangan bo‘lsa-da, ertasi kuni bozorda yana pessimizm hukm surdi.

Tavakkalsiz bozorda kim qarz oladi?
Xavfli obligatsiyalar – bu moliyaviy ahvoli zaif, foizlari yuqori bo‘lgan kompaniyalar chiqaradigan qimmatli qog‘ozlar. Investorlar ushbu kompaniyalarga kredit berishi evaziga yuqori daromad kutadi.

Ammo sarmoyadorlar xavfdan qo‘rqib, pulni qaytarib olayotgan bir paytda bu kompaniyalar uchun pul topish murakkablashadi. Yo pul umuman bermaydi, yoki faqat og‘ir foizlar evaziga beradi.

Natijada, ko‘plab firmalar bankrot bo‘lishi mumkin, bu esa zanjirli reaksiyaga sabab bo‘ladi: bankrotliklar → kamaytirilgan investitsiyalar → iqtisodiy muzlash → ishsizlik.

Siz nima deb o‘ylaysiz — AQSH iqtisodiyoti ushbu bosimga qancha chidam bera oladi? “Zamin”ni Telegramʻda oʻqing!