Angliyada mashhur yulduzlar yoqtirgan orol 33 million dollarga sotuvga chiqdi

^{Foto: BBC}
Angliyaning Moldon shahri yaqinidagi Blekuoter daryosining quyilishida joylashgan tarixiy Osi oroli 33 million dollarga sotuvga qo‘yildi. Bu haqda BBC nashri xabar tarqatdi.

Ko‘chmas mulk agentlarining ta’kidlashicha, ushbu orolga bo‘lgan talab ayniqsa yuqori darajada bo‘lib, xarid qilish istagida bo‘lganlarning soni kundan kunga ortmoqda. Bunga sabab sifatida orolning mashhur tarixiy voqealar va ko‘plab yulduzlarning xotiralari bilan bog‘liq ekanligi ko‘rsatilmoqda.

^{Foto: BBC}
Jumladan, Britaniyaning mashhur reperi va qo‘shiqlar muallifi Stormzy aynan shu orolda o‘zining «This Is What I Mean» deb nomlangan mashhur albomi ustida ijodiy ish olib borgan. Shuningdek, orolda bir necha mashhur filmlar va kliplar ham suratga olingan bo‘lib, ular orasida 2012 yilda chiqqan "Qora libosli ayol" filmi alohida ajralib turadi.

Fine and Country ko‘chmas mulk agentligi vakili Saymon Pellingning aytishicha, sotuv bo‘yicha ko‘plab takliflar olingan va ayrim xaridorlar hatto belgilangan narxdan ham yuqori takliflar bildirmoqda.

“Bizga bir nechta takliflar kelib tushdi, ayrimlari hatto belgilangan narxdan ham yuqori”, dedi Fine and Country rieltorlik kompaniyasidan Saymon Pelling.

Osi oroli faqatgina ijodkorlarning ilhomlanish manbai emas, balki mashhur yulduzlarning sevimli dam olish maskani ham bo‘lib kelgan. Masalan, jahonga tanilgan xonandalar Rianna va Olli Mers kabi yulduzlar bu yerda o‘zlarining yorqin va esda qolarli to‘y marosimlarini o‘tkazgani ma’lum qilingan.

^{Foto: BBC}
Sotuvga qo‘yilgan ushbu orolning umumiy maydoni 1,5 kvadrat kilometrni tashkil qiladi. Sotuvchilarning ta’kidlashicha, ushbu xaridning asosiy afzalliklaridan biri uning Britaniya poytaxti Londonga yaqinligi va ajoyib, ko‘zni quvontiruvchi manzaralari hisoblanadi.

Hozirda ushbu orolga kim egalik qilishi va u qanday maqsadlarda foydalanilishi ko‘pchilik uchun qiziq bo‘lib turibdi. Biroq, bugungacha Osi orolining yangi egasi kim bo‘lishi hali aniq emas. “Zamin”ni Telegramʻda oʻqing!