Trampning Qatarga tashrifi: AQSH 1,2 trillion dollarlik tarixiy bitimlarga erishdi!

AQSH prezidenti Donald Trampning Yaqin Sharq mamlakatlariga safari davomida navbatdagi manzili Qatar davlati bo‘ldi. Bu tashrif ikki davlat o‘rtasidagi munosabatlarni yangi darajaga ko‘targani ta’kidlanmoqda. Oq uy matbuot xizmati tomonidan berilgan ma’lumotga ko‘ra, ikki mamlakat rahbarlari iqtisodiy va mudofaa sohalari bo‘yicha umumiy qiymati 1,2 trillion dollardan ortiq bo‘lgan yirik shartnomalarni imzolashga muvaffaq bo‘lgan.

Bu tarixiy bitimlarni imzolash jarayonida prezident Tramp va Qatar amiri Shayx Tamim bin Hamad ol Soniy ishtirok etgan. AQSH ma’muriyatining ta’kidlashicha, ushbu kelishuvlar mamlakat iqtisodiyoti uchun «yangi Oltin asr» eshiklarini ochib beradi va kelajak avlodlarga farovonlik hamda innovatsiyalar imkoniyatini yaratadi.

Birinchi galda, mudofaa sohasidagi hamkorlik e’tibor markazida bo‘ldi. Qatar AQSHning eng yirik mudofaa kompaniyalaridan zamonaviy harbiy texnika sotib olish bo‘yicha kelishuvlarga erishdi. Xususan, dunyoda o‘zining yuqori texnologiyalari bilan mashhur bo‘lgan Raytheon (Raytheon) kompaniyasidan zamonaviy dronlarga qarshi kurashish uchun mo‘ljallangan maxsus FS-LIDS (Raytheon Fixed Site – Low, Slow, Small Unmanned Aerial System Integrated Defeat System) tizimlarini xarid qiladi. Shu bilan Qatar ushbu innovatsion mudofaa texnologiyalarining ilk xalqaro xaridori bo‘lib qolmoqda.

Shuningdek, Qatar yana bir AQSH mudofaa kompaniyasi – General Atomics bilan ham hamkorlik aloqalarini mustahkamladi. Bu hamkorlik doirasida Qatar 2 milliard dollarga baholangan eng yangi uchuvchisiz uchish apparatlari (MS-9B) bilan o‘z qurolli kuchlarini ta’minlashni rejalashtirmoqda.

Mudofaa sohasidagi shartnomalar bilan birgalikda iqtisodiy hamkorlik yo‘nalishida ham qator muhim bitimlarga imzo chekildi. Xususan, dunyodagi yirik aviakompaniyalardan biri hisoblangan Qatar Airways AQSHning mashhur samolyotsozlik konserni Boeing bilan katta hajmda shartnoma imzoladi. Ushbu shartnoma bo‘yicha Qatar aviakompaniyasi 160 ta eng zamonaviy samolyotni sotib oladi, bitimning umumiy qiymati esa taxminan 200 milliard dollarni tashkil etadi.

Prezident Donald Tramp ushbu bitimlarning imzolanishini yuqori baholab, bunday yirik miqyosdagi kelishuvlarni AQSH iqtisodiyotining yangi bosqichga o‘tishida muhim qadam sifatida qayd etdi. «Bu bitimlar orqali biz mamlakatimizda ishlab chiqarish sohasini yanada rivojlantiramiz, yangi ish o‘rinlari yaratamiz hamda Amerikaning dunyodagi texnologik yetakchiligini yanada mustahkamlaymiz», — dedi AQSH prezidenti o‘z chiqishida.

Oq uy vakillari mazkur shartnomalarni nafaqat iqtisodiy ahamiyatini ta’kidlab, balki ularning strategik jihatdan ham muhimligini alohida qayd etdilar. Ularning ta’kidlashicha, AQSH va Qatar o‘rtasidagi bunday yirik kelishuvlar mintaqadagi xavfsizlik va barqarorlikni mustahkamlashga xizmat qiladi.

Ekspertlar ham bu kelishuvlarni ijobiy baholab, ikki mamlakat o‘rtasidagi hamkorlikning kelajakda yanada chuqurlashishiga ishonch bildirishmoqda.

Zamin.uz tahririyati dunyo siyosat va iqtisodiyotidagi muhim o‘zgarishlarni kuzatishda davom etadi! “Zamin”ni Telegramʻda oʻqing!