AQSh vizasi o‘zbekistonliklar uchun yengillashtirilishi mumkin

O‘zbekistonda AQSh fuqarolari uchun 30 kunlik vizasiz rejim joriy etilishi mumkin, deb xabar bermoqda Nova24.uz.

15-may kuni Prezident Shavkat Mirziyoyev “2025–2026-yillarda turizmning iqtisodiyotdagi o‘rnini oshirish chora-tadbirlari to‘g‘risida”gi farmonni imzoladi. Farmonga ko‘ra, 2025-yil oktabr–noyabr oylarida “Markaziy Osiyo – Yevropa Ittifoqi” turizm forumi va 2026-yil aprel oyida “Yo‘nalish — Qoraqalpog‘iston” forumi o‘tkazilishi rejalashtirilgan.

Farmonda, shuningdek, Tashqi ishlar vazirligiga AQSh fuqarolari uchun 30 kunlik vizasiz rejimni joriy etish hamda o‘zbekistonliklar uchun AQSh vizasini yengillashtirish bo‘yicha muzokaralarni boshlash topshirig‘i berilgan. Takliflar 3 oy muddatda kiritilishi lozim.

Bundan tashqari, Rossiya, Qozog‘iston va Ozarbayjon fuqarolariga O‘zbekistonga 30 kungacha bo‘lgan muddatga ichki hujjat yoki shaxsni tasdiqlovchi guvohnoma (jumladan 16 yoshga to‘lmaganlar uchun “bolalar pasporti”) asosida kirish imkonini yaratish ham rejalashtirilgan.