Yosh cheklov emas: 71 yoshli Xitoylik ayol hammani hayratga soldi!

Yashash uchun yosh cheklov emas! 71 yoshli Sun Minxuey bu haqiqatni amalda isbotladi. Xitoyning Uxan shahrida o‘tkazilgan National Fitness Newcomers Quality Competition 2025 musobaqasida u bronza medalini qo‘lga kiritdi va barcha ishtirokchilar orasida eng keksa sportchi sifatida e’tirof etildi. Bu haqda South China Morning Post nashri xabar berdi.

Minxueyning saraton kabi ruhlantiruvchi yo‘li nafaqaga chiqqanidan so‘ng boshlangan. 67 yoshida hayotida yangi sahifa ochib, sport bilan jiddiy shug‘ullanishga qaror qiladi. U dastlab velosiped haydash, arqonda sakrash, yugurish va piyoda sayr qilish kabi turli mashg‘ulotlar bilan tajriba o‘tkazgan. «Bir oydan sal ko‘proq mashg‘ulotdan so‘ng tanada o‘zgarishlarni seza boshladim. Yoshim kattalashgani bilan mushaklarimni yo‘qotmadim, aksincha, ularni ko‘paytirdim. Bu menga katta ishonch va yangi maqsadlar baxshida etdi», deydi Minxuey.

Ayni paytda u haftasiga kamida besh marta mashq qiladi va har kuni muvozanatli ovqatlanishga alohida e’tibor qaratadi. Uning hayotga bo‘lgan munosabati va intizomi yoshlarga ham o‘rnak bo‘ladigan darajada.

Mana, bir misol: 60 yoshida Minxuey Xitoyning eng sharqiy nuqtasidan eng janubiy shahri — Sanyagacha velosipedda 6 ming kilometrlik masofani bor-yo‘g‘i 45 kunda bosib o‘tgan! Shu tariqa u jamoadoshlari bilan birgalikda Ginnes rekordlar kitobidan joy oldi.

«Yosh — bu shunchaki raqam, cheklov emas. Ba’zilar keksalar faqat choy ichib, parkda sayr qilishi kerak deb o‘ylashadi, men esa yanada faol, ruhlantiruvchi hayot tarzini tanladim», — deydi u ishonch bilan.

Minxueyning barchaga bir maslahati bor: hayotda o‘zgarish qilish, yangi maqsadlar qo‘yish va ular sari intilish hech qachon kech emas. Uning faoliyati va natijalari keksa avlod va yoshlar uchun ham ilhom manbai bo‘la oladi. Bir so‘z bilan aytganda, yosh cheklov emas — balki katta imkoniyatlar eshigidir!

Foto: Pravilamag.ru