Eron raketalarni nega kamaytirdi? Oqibatlar va yashirin strategiya

Yaqin Sharq osmonida yangi qarama-qarshilik davom etar ekan, Eronning so‘nggi harbiy strategiyasi xalqaro tahlilchilar va siyosiy kuzatuvchilar diqqat markaziga chiqdi. Oxirgi kunlarda Isroilga qarshi amalga oshirilayotgan raketa zarbalari sonida keskin kamayish kuzatilmoqda. Bu kamayish Eron raketalari tugab qolganidan emas, balki — strategik yondashuv o‘zgarganidan dalolat beradi.

Ko‘p emas, aniq! Eronning taktik qarashi o‘zgardi
CNN telekanali manbalariga ko‘ra, Eron harbiy rahbariyati katta miqdorda raketa uchirish o‘rniga, aniq va to‘g‘ri nishonga yo‘naltirilgan yuqori texnologiyali raketa turlarini qo‘llashga qaror qilgan. «Endi biz har doimgidek yuzlab raketa bilan emas, balki har bir zarbasi maqsadga yo‘naltirilgan yuqori aniqlikka ega qurollar bilan ish tutamiz», — degan Eron rasmiy manbasi telekanalga bergan izohida.

Manbaning aytishicha, Eron tomoni «THAAD» va «Patriot» (AQSH), shuningdek, Isroildagi «Arrow-2», «Arrow-3», «Dovud pallaxmoni» va «Temir gumbaz» kabi havodan mudofaa tizimlarini osongina yengib o‘tadigan raketa turlarini qo‘llay boshlagan. Eng muhimi, bu raketa zarbalari oldindan belgilangan harbiy va strategik nuqtalarga aniq tegmoqda.

Hamla kam, ta’sir kuchli
13 iyundan boshlab Isroilga qarshi javob zarbalarini boshlagan Eron avvalgi hujumlarda yuzdan ziyod raketa uchirgan edi. Biroq hozirgi paytda, Isroil manbalari ma’lumotiga ko‘ra, bir kunda o‘ntadan ham kam raketa otilmoqda. Masalan, 21 iyunga o‘tar kechasi amalga oshirilgan hujumda beshta raketa qo‘llangan, lekin ularning har biri — ballistik raketa bo‘lgan.

Ya’ni, Eron soni emas, sifatiga ishonayotganini amalda isbotlayapti. Bu yondashuv har bir zarbaning aniq va tahliliy hisob-kitob bilan amalga oshirilayotganini ko‘rsatadi.

Kameralar orqali josuslik: Frankoning da’vosi
Isroil Milliy kiberboshqarmasi rahbarining sobiq o‘rinbosari Rafael Frankoning so‘zlariga ko‘ra, Eron oxirgi kunlarda Isroildagi shaxsiy kuzatuv kameralariga ulanish orqali amalga oshirilgan zarbalarning samaradorligi va aniqligini tahlil qilishni boshlagan. Bu esa, kiberxavfsizlik sohasida ham o‘zaro to‘qnashuv kuchayganini ko‘rsatadi.

Isroil ham javobsiz qolmayapti
Eronning aniq zarbalariga javoban Isroil tomoni ham samolyotlari orqali Erondagi raketalar saqlanuvchi omborlar, uchirish maydonlari va hatto yadroviy infratuzilma nuqtalarini nishonga olgani xabar qilinmoqda. Bu qarama-qarshilikning yanada chuqurlashishi xavfini yaratadi.

Xulosa: Yangi davr, yangi urush uslubi
Eronning raketa strategiyasidagi bu keskin o‘zgarish nafaqat harbiy, balki geosiyosiy nuqtayi nazardan ham jiddiy ahamiyatga ega. Bugun urushlar «ko‘p zarba» emas, «belgilangan zarba» davriga kirmoqda. Isroil uchun bu, shubhasiz, xavotirli signal. Har bir aniq zarba ortida — texnologik ustunlik, aniq razvedka va murakkab harbiy hisobi bor.

Ham diplomatiya, ham xavfsizlik nuqtayi nazaridan Yaqin Sharq yana qaynoq nuqtaga aylanmoqda. Va undagi har bir harakat — jahon xavfsizligidagi tenglamani o‘zgartirishi mumkin. “Zamin”ni Telegramʻda oʻqing!