Indoneziyada chaqaloqlar savdosi fosh etildi: mudhish tafsilotlar

Indoneziyada bolalar taqdiri savdo predmetiga aylandi: politsiya xalqaro sindikat faoliyatini fosh etdi, deb xabar berdi bbc.com. Rasmiy ma’lumotlarga ko‘ra, jinoyatchilar guruhi 2023 yildan buyon kamida 25 nafar chaqaloqni Singapurdagi xaridorlarga sotish bilan shug‘ullangan. Ochiqlangan sxemalarda bolalar hatto ona qornidayoq «zaxira» qilib qo‘yilgan holda, maxsus tarmoq orqali savdoga chiqarilgan.

Politsiya bu hafta Pontianak va Tangerang shaharlarida yana olti chaqaloqni sotish arafasida 13 kishini hibsga oldi. Rasmiylar ma’lum qilishicha, chaqaloqlar maxsus xonadonlarda saqlangan va ularga Singapurga olib chiqish uchun immigratsiya hujjatlari rasmiylashtirilgan. G‘arbiy Yava politsiyasi jinoiy tergov bo‘limi boshlig‘i Suravan, “Bu bolalarga barcha rasmiy hujjatlar tayyorlanib, ular maxsus tartibda Singapurga jo‘natilgan”, deya ta’kidladi.

Ma’lum bo‘lishicha, sindikat o‘z faoliyatida ota-onalarning moliyaviy qiyinchiliklaridan foydalangan. Aynan o‘z farzandini tarbiyalashga ojiz yoki moddiy imkoniyati yo‘q ota-onalar, yoki bo‘lajak onalar bilan ijtimoiy tarmoqlar, ayniqsa Facebook va WhatsApp orqali aloqa o‘rnatilgan. Ba’zi hollarda, chaqaloqlar tug‘ilgunga qadar «rezervatsiya» qilib qo‘yilgan, onaga tug‘ruq xarajatlari to‘lab berilgan va keyinchalik muayyan miqdorda pul evaziga chaqaloqlar olib ketilgan.

Tergov davomida aniqlanishicha, bolalarni sotish sxemasida izlovchilar, vasiylar, xonadon egalari hamda hujjatlarni soxtalashtiruvchi shaxslar ishtirok etgan. Chaqaloqlar onadan olib qo‘yilgach, ular 2-3 oyga vasiylarga topshirilgan, keyin esa Jakarta va Pontianak shaharlarida tug‘ilganlik to‘g‘risidagi guvohnoma, pasport va boshqa hujjatlar tayyorlangan.

Savdo narxlari ham rasman qayd etilgan: har bir chaqaloq 11-16 million Indoneziya rupiyasiga (670-980 dollarga) sotilgan. Sindikat ishtirokchilari so‘roq paytida Indoneziyada ham, undan tashqarida ham kamida 12 nafar o‘g‘il va 13 nafar qizni sotganini bildirishgan.

Politsiyaning taxminicha, ayrim ota-onalar moliyaviy qiyinchilik tufayli farzandlarini sotishga rozi bo‘lgan. Agar kelishuv isbotlansa, barcha ishtirokchilarga bolalarga qarshi jinoyatlar va odam savdosi moddalari bo‘yicha ayblov qo‘yiladi.

Hozirda Indoneziya politsiyasi Interpol va Singapur politsiyasiga sindikatning chet eldagi a’zolarini va bolalarni sotib oluvchilarni topishda yordam so‘rab murojaat qilgan. Tahlilchilar fikricha, mazkur holat jamiyatdagi katta muammolardan biri — inson savdosi va bolalar huquqlari buzilishiga jamoatchilik e’tiborini yanada kuchaytiradi. “Zamin”ni Telegramʻda oʻqing!