Rossiyada qurilishda ikki o‘zbek fuqarosi halok bo‘ldi

Rossiyaning Leningrad viloyatida sodir bo‘lgan fojea yana bir bor mehnat muhojirlari muammosini kun tartibiga olib chiqdi. Qurilish maydonida yuz bergan hodisa oqibatida ikki nafar o‘zbekistonlik ishchi halok bo‘ldi. Ular ishlayotgan vaqtida devor qulab tushgan va konstruktsiya qismlari ostida qolgan, deb Zamin.uz xabar berdi.

Rasmiy ma’lumotlarga ko‘ra, yana bir — 37 yoshli o‘zbekistonlik erkak og‘ir tan jarohatlari bilan shifoxonaga yotqizilgan. Uning ahvoli og‘ir ekani, hozirda shifokorlar jonini saqlab qolish uchun zaruriy choralarni ko‘rayotgani aytilmoqda.

Mahalliy tergov organlarining dastlabki xulosasiga ko‘ra, vafot etgan fuqarolar Rossiyada noqonuniy tarzda mehnat faoliyatini olib borishgan. Ular ro‘yxatdan o‘tmagan, rasmiy ish shartnomasi imzolamagan va xavfsizlik qoidalari bo‘yicha ruxsatnomasiz ishlayotgan bo‘lishgan.

Tekshiruv natijalariga ko‘ra, qurilish obyekti xavfsizlik talablariga javob bermagan, devorlarning mustahkamligi ta’minlanmagan va ishchilarning himoya vositalari bilan ta’minlanmagani aniqlangan. Hozirda qurilish maydoni yopilgan va tergov ishlari boshlangan.

Jinoyat ishi qo‘zg‘atilgan, ish beruvchi kompaniya rahbariyati va javobgar shaxslar so‘roqqa chaqirilgan. Rossiya hukumati bu kabi fojialarning oldini olish uchun migratsion mehnatga oid nazoratni kuchaytirishni ta’kidlamoqda.

O‘zbekiston Tashqi mehnat migratsiyasi agentligi ham voqea yuzasidan munosabat bildirib, halok bo‘lganlarning shaxsini aniqlash, ularning yaqinlari bilan bog‘lanish va zarur yordam ko‘rsatish ustida ish olib borilayotganini ma’lum qildi.

Bu voqea jamoatchilik orasida qayg‘u va achinish bilan qarshi olindi. O‘zbekistonlik muhojirlar huquqlarini himoya qilish, xavfsiz ish sharoitlari yaratish masalasi yana bir bor kun tartibiga chiqdi.

Har bir inson mehnat qilish huquqiga ega, ammo bu huquq xavfsizlik va qonuniylik bilan birga ta’minlanishi kerak. Yurtimiz fuqarolari chet elda ishlashni rejalashtirayotgan bo‘lsa, rasmiy kanallar, shartnoma asosida ishga joylashish va diplomatik yordam imkoniyatlaridan xabardor bo‘lishi zarur. “Zamin”ni Telegramʻda oʻqing!