Xitoyning Shansi viloyatida politsiya tomonidan tarixiy yodgorlikni buzishga uringan juftlik qo‘lga olindi. Ular ming yillik tarixga ega bo‘lgan Buyuk Xitoy devorining og‘ir toshlarini qirqib, onlayn bozorda sotish bilan shug‘ullangan.
Pravilamag nashrining xabar berishicha, Linfen shahri politsiyasi marketpleysdagi shubhali e’lon orqali ushbu ishni fosh etdi. E’londa: "Buyuk Xitoy devorining haqiqiy g‘ishti sotiladi. Narxi — 95 yuan (o‘zbek so‘mida taxminan 170 ming)" deb yozilgan.
Qonunchilar jinoyat iziga tushgach, ular qonunni buzgan juftlik — Van va Chjenni Beychjunxuan qishlog‘ida ushlashdi. Ular XIV–XVII asrlarda Min sulolasi davrida qurilgan devorning qadimiy bo‘laklarini buzib, sotib yurgan.
Ma’lumotlarga ko‘ra, juftlik allaqachon 100 dan ziyod devor toshlarini turli xaridorlarga sotishga ulgurgan. Eng qizig‘i, ba’zi mijozlar sotib olgan toshlardan juda mamnun bo‘lgani sababli, yana bir necha dona buyurtma berishni istagan.
Buyuk devorning kelib chiqishiga ayollar sababchi bo‘lganmi?
Eslatib o‘tamiz, ilgariroq olimlar olib borgan tadqiqotlarga ko‘ra, Buyuk Xitoy devorining qurilishiga xunnu nomli ko‘chmanchi xalqning hujumlari sabab bo‘lgan. Ushbu xalqning armiyasida esa ayol jangchilar muhim o‘rin tutadigan bo‘lgan.
Yuqoridagi holat Xitoydagi tarixiy yodgorliklarni muhofaza qilish borasidagi muammolarga yana bir bor diqqat qaratish zarurligini ko‘rsatmoqda. Bu nafaqat Xitoy, balki dunyodagi barcha tarixiy meroslar uchun dolzarb masala sanaladi.
“Zamin”ni Telegramʻda oʻqing!
