Hindistonning Jammu shahrida politsiya noodatiy va ajib holatga duch keldi: poytaxt temiryo‘l vokzaliga portlash yuborish haqida kabutar orqali yetkazilgan xat topildi va kabutar hibsga olindi. Bu haqda mahalliy huquq-tartibot organlari xabar berdi.
Voqea 18 avgust kuni kechqurun Katmariya hududida, Pokiston bilan chegaraga yaqin masofada sodir bo‘lgan. Kabutarning oyog‘iga bog‘langan xatda urdu va ingliz tillarida “Kashmir Freedom” (Kashmir ozodligi), “Time has come” (Vaqt keldi) degan so‘zlar yozilgan edi va temiryo‘l vokzalida portlash bo‘lishi mumkinligi haqida ogohlantirilgan.
Maxsus manbalarning ma’lumot berishicha, bu Hindistonda kabutar orqali yetkazilgan birinchi tahdid xati sifatida qayd etilmoqda. Avvalroq, mamlakat hududidan Pokiston tarafidan havo sharlari, bayroqlar va turli yozuvlar uchirilgani kuzatilgan, lekin kabutar orqali xat yuborish holati birinchi marta ro‘y bermoqda.
Politsiya xavfsizlik choralarini qat’iy kuchaytirdi. Vokzal va temiryo‘l atrofida qo‘shimcha kuchlar, kinologlar va sapyorlar joylashtirildi. Mutaxassislar voqeani oddiy hazil yoki puxta rejalashtirilgan fitna sifatida aniqlashga harakat qilmoqda.
Ekspertlar fikriga ko‘ra, kabutar maxsus tarzda o‘rgatilgan bo‘lishi mumkin va shu sababli huquq-tartibot idoralari bunday noodatiy tahdidlarga jiddiy yondashmoqda. Ular bu holatni tekshirishda barcha imkoniyatlardan foydalanmoqda, xatning kim tomonidan va qanday maqsadda yuborilganini aniqlashga harakat qilmoqda.
Bu voqea hindistonlik aholini hayratga soldi va kabutarlar orqali ham jiddiy tahdidlar keltirilishi mumkinligini ko‘rsatdi. Poytaxt va chegara hududlarida xavfsizlik choralari hozirda maksimal darajada saqlanmoqda.
“Zamin”ni Telegramʻda oʻqing!
