Janubiy Karolina shtatida uzunligi 3,6 metr bo‘lgan to‘rli piton ko‘chada tutildi, deb xabar bermoqda UPI. Bu ulkan ilon bir necha hafta davomida Nyuberri okrugi aholisi orasida vahima uyg‘otgan.
Pitonni izlash uchun mahalliy fuqarolar harakatga tushdi. Uni tutish ishida havaskor ilon ovchisi Evan Terner ham ishtirok etdi. Piton qarshilik ko‘rsatdi va hattoki bir erkakni butalarga yiqitdi, biroq oxir-oqibat uni zararsizlantirishga muvaffaq bo‘lishdi.
Ushbu turdagi piton bu hududda uchramasligi bois, uning qayerdan paydo bo‘lgani noma’lum. Sherif taxminicha, bu uy hayvoni sifatida boqilgan, lekin kattaligi sabab tashlab yuborilgan bo‘lishi mumkin. Hozircha piton Uorren ismli shaxs qaramog‘ida bo‘lib turibdi, unga doimiy joy izlanmoqda.
Avvalroq Sankt-Peterburgda Vasya laqabli piton terrariumni sindirib qochishga uringan, ammo yoritgich halqasiga tiqilib qolgan edi. Egasi uni veterinarga olib borgan, mutaxassislar uni faqat yengil tirnalgan holda qutqarishgan.
Shuningdek, Los-Anjeles markazida Jozef Hart ismli ilon ovchisi hech qanday uskunalarsiz, chiqindi qutisidan 7 metrlik pitonni qo‘llari bilan tutib olgan edi.
“Zamin”ni Telegramʻda oʻqing!
